Казан шәһәре Совет районының «Арт Сити» торак комплексында урнашкан 11-нче номерлы «Унбер» күппрофильле лицее күптән түгел генә ачылуына да карамастан, инде үзләренең барлыгы турында киң җәмәгатьчелеккә күрсәтергә дә өлгерделәр. Шау-гөр килеп 1 енче сентябрьдә ачылдылар да, үз алларына куелган бурычларны үтәү юлында кызу эшкә керештеләр. Казан Мэриясе татар теле укытучылары өчен татар телен нәтиҗәле һәм заманча укыту буенча семинарлар циклын башлап җибәрде. Беренче семинар «Унбер» лицеенда узды. Тулырак хәбәрчебез Фәннур Хәсәнов язмасында.
Татар телен укытуның заманча, кызыклы ысулларын кулланып балаларның татар теле дәресенә игътибарын арттырып буламы? Мәгариф системасында татар телен укытуда уңыш казанырлык нинди яңалыклар бар? Чит телләр өйрәнүдәге тәҗрибәләрне татар телен өйрәнүдә ничек кулланырга? Семинарлар әлеге һәм башка бик күп сорауларга җавап бирәчәк.
Семинарда Казан мәктәпләреннән 280 татар теле укытучысы катнашты. Остазлар – «Унбер» лицее директоры Алмаз Нуретдин улы Хәмидуллин, «Унбер» лицееның татар теле укытучысы Гөлфия Илнур кызы Габдуллаҗанова, «Иннополис мәктәбе»нең татар теле укытучысы Альберт Дамир улы Сәмигуллин, 7нче номерлы мәктәп-лицейның инглиз теле укытучысы Госман Салихҗан улы Гайнуллин; Канадада татарча онлайн-мәктәп оештыручы Алимә Сәләхетдиновалар чыгыш ясап, катнашучыларда зур кызыксыну уяттылар.
Проектның кураторы – «Унбер» лицееның татар теле укытучысы Рашат Нух улы Якупов. Проект Туган телләр һәм халыклар бердәмлеге елы азагына кадәр дәвам итәчәк.
Фәннур Хәсәнов, Таһир Хәсәнов Татарстан яңалыклары.
