Үткәннәрдән башка киләчәк юк. Буа районында юкка чыккан авыллар, тарихи корылмалар урынында истәлек һәйкәлләре салу, мемориаль такталар урнаштыру программасы гамәлдә. Яңа Тинчәле авылының иске мәчет урынында да үзенчәлекле һәйкәл корыла.Ул ике гөмбәздән тора. Изге йорт тарихын чагылдырган таш куела. Әлеге корылманың иганәчесе — шушы авылда туып-үскән, Яшел Үзәндәге Серго исемендәге заводның генераль директоры Радик Хәсәнов. Изге урынны хәбәрчебез дә күреп кайтты.
Бу борынгы мәчет патша Екатерина Икенче Указы буенча унсигезенче гасыр уртасында ук төзелгән. Тик совет чорында мәчет гыйбадәт кылу, дини вәгазьләр әйтү урыны булудан туктый. Изге йортны склад итәләр, ә соңгы елларда клуб буларак файдаланганнар.
Узган гасыр ахырында мәчет бинасын сүтәргә булганнар. Радик Хәсәнов буыннар истәлеге итеп, изге урында һәйкәл куярга ниятли.
Көннәр көйле торса, һәйкәлне октябрь ахырына ук салып бетерергә җыеналар. Киләчәктә изге урынны койма белән әйләндереп алырга, агачлар утыртырга планлаштыралар.
Алсу Сәмигуллина, Гакыйл Камалетдинов, Татарстан яңалыклары, Буа районы.
