Бүген тапшыруыбызны кайгылы яңалыклар белән башлыйбыз. Минзәләдә парашютчылар утырган самолет һәлакәткә юлыкты. Күтәрелеп китүгә үк бер двигателе сүнә һәм самолет җиргә төшеп җимерелә. Парашютта очрага җыенган 22 кешенең 16 сы вафат була. Һәлак булучыларны искә алу йөзеннән 11 октябрь Татарстанда матәм көне буларак игълан ителде. Татарстан Республикасы Президенты Рөстәм Миңнеханов Минзәлә районында җиңел моторлы самолет һәлакәтендә вафат булганнарның туганнары һәм якыннарының кайгысын уртаклашты.
Фаҗига урыныннан тулырак мәгълүмат хәбәрчеләребез репортажында.
Җиргә мәтәлеп төшкәннән соң очкыч шушы халәттә табыла. Җимерелгән, бәрелүдән каерылгын канатларның очар сәләте калмаган. Хәер, беренче булып бирегә килгән коткаручылар һәм медицина хезмәткәрләренә самолет хәле мөһим түгел , алар кичекмәстән мохтаҗларга ярдәм итәргә ашыга. һәр секунд кадерле.
Уртага ярылган самолетта алты кеше исән кала, ә 16 сы , шул исәптән ике пилот та фаҗига урыныда һаләк булган.
Зыян күрүчеләр Чаллы шәһәренең Ашыгыч медицина ярдәме хастаханәсендә дәвалана. Һәлакәт урынына Татарстан Президенты Рөстәм Миңнеханов килде.
Ул арада фаҗига турында ишетеп аэроклубка халык агыла башлый. Якыннары, дуслары.
Самолетта һаләкәткә юлыгучылар парашют спорты белән шөгыльләнүчеләр. Араларында беренче тапкыр сикерергә җыенучылар да булган. Төрлесе төрле төбәкләрдән. Башкортстан, Марий Эл, Удмуртия, Ульяновск, Киров һәм Чиләбе өлкәләреннән килүчеләр дә бар. Әмма күбесе Татарстан кешеләре.
Аэроклубта тикшерү эшләре бара, документларны, шул исәптән самолетның техник әзерлеген да өйрәнәсе бар. Фаҗига чыгуның беренче фаразы — лайнерның техник төзексезлеге. Аэроклуб башлыгы башка сәбәпләр булуын да искәртә..
Билгеле булганча, штурвал артында йөзләгән сәгать очкан тәҗрибәле пилотлар. Самолетны кеше яшәгән йорт өстенә төшмәсен өчен икесе дә кулдан килгәннең барын да эшләгән.
ДОСААФ оешмасы Россиядә җиңел моторлы Эль-410 очкычын туктатырга карар кылды. Бер ай элек шундый ук фаҗига Иркутскида булган иде . Минзәлә аэроклубы да тикшерү вакытында эшен туктатып тора. Әлегә биредә хәтер мемориалы корылды. Халык һаләк булучыларның кайгысын уртаклаша.
Алмаз Хәкимов, Мөршидә Җиһан, Ренат Сәхипгәрәев. Татарстан яңалыклары.
