Китап һәм шигърият халкыбызның мәңгелек юлдашы. Бүгенге көндә кесә китабы форматындагы җыентыклар чыгару иң отышлы алым. Бигрәк тә яшь шагыйрь, язучылар өчен үз китабыңны булдыру — зур вакыйга. Бу яңа талантлар табарга, аларга киләчәктә дә туктап калмаска, иҗат итәргә омтылыш бирә.
Татарстан китап нәшриятының җәйге аланчыгында яшь авторлар катнашкан чара белән тулырак киләсе язмада танышырга мөмкин.
Быелгы җәйнең матур көннәренә һәммәбез соклана. Шул мөмкинлкетән файдаланып, тормыш шау-шуыннан арынып, җанга ял алыйм дисәң, яраткан китабыңны кыстыр да табигатькә чык икән.
Татарстан китап нәшрияты «Татмедиа» акционерлык җәмгыяте бинасы янындагы «Әдәби кафе»ның җәйге мәйданчыгында әлеге мөмкинлекне тудырды. Яшь авторлар: Алмаз Мансуров, Лилия Гыйбадуллина, Булат Ибраһимов, Гөлназ Газизова, Ләйлә Хәбибуллинаның кесә китабы форматындагы шигырь җыентыкларын яңа форматта тәкъдим итте.
Кесә китабы сериясы белән чыккан җыентыкта аларның моңарчы бер кайда да чыкмаган эсәрләре урын алган. Укучылары белән очрашуда яшь авторлар үзләре белән таныштырды, шигырьләрен укыды.
Авторлар яшь булуларына карамастан, аларның шигырьләрендә тирәнлек, татар тарихы, гамьле күңелләре чагыла. Ләйлә Хәбибуллина өчен әлеге очрашу бигрәк тә дулкынландыргыч, бу аның тәүге китабы.
Яшь шагыйрь, язучылар өчен үз китабыңны булдыру — зур вакыйга. Бүгенге чара аларга киләчәктә дә туктап калмаска, иҗат итәргә омтылыш бирсен. Китап һәм шигърият халкыбызның мәңгелек юлдашы булсын дигән теләктә бүгенгә саубуллашам
