Ватан сакчылары онытылырга тиеш түгел. Кукмара районының Ядегәр авылында низаглы урыннардагы сугышларда һәлак булучылар истәлегенә һәйкәл ачылды. Ул җирле мәктәп янында, Бөек Ватан сугышы елларында яу кырында ятып калган авылдашлары һәйкәле янында торгызылды. Тантанада Ватанны саклаучыларны зурлап искә алдылар.
Ядегәр авыл җирлегендә меңнән артык кеше яши. Сугыш елларында ир-егетләрнең күпчелеге яу кырына китә. Сугыш кырында ятып калган авылдашларының якты истәлеген онытмыйлар. Бөек Җиңүнең 75 еллыгына авыл мәктәбе янында сугыш ветераннарына һәйкәл ачылган иде. Быел янәшәдә тагын бер обелиск урнаштырылды.
Һәйкәлгә акча үзара салым программасы буенча җыелган. Бер генә авыл кешесе дә читтә калмаган. Хәйриячеләр дә булышкан.
Әфган сугышы ветераннарының республика координацион советы җитәкчесе Иван Егоров исеменнән рәхмәт сүзләре җиткерелде. Һәйкәл салуны башлап йөрүчеләргә рәхмәт хатлары, истәллекле бүләкләр тапшырылды.
Митингта Ватан азатлыгы өчен гомерләрен корбан иткән сугышчыларны бер минутлык тынлык белән искә алдылар.
Каһарманнар истәлеген мәктәп укучылары да искә алды. Күпләрнең бабалары Бөек Ватан сугышында, туганнары Әфганстан, Чечнядагы канкойгыч бәрелешләрдә катнашкан. Митинг тәмамлангач, авылдашлар һәм кунаклар авыл зыяраты янына җыелып, фронтовикларны искә алдылар. Алар хөрмәтенә хәрби салют бирелде.
Дмитрий Второв, Татарстан яңалыклары, Кукмара районы.
