Изге Мөхәррәм аенда Буа районында 63нче мәчет үз ишекләрен ачты. Татарстан Республикасы агросәнәгать комплексының ветераннар Советы җитәкчесе Марс Алиев ярдәме белән Иске Тинчәле авылында Аллаһ йорты ачылды. Авыл халкы белән беренче намаз тавышларын хәбәрчебез Айзилә Батырханова да тыңлап кайтты.
Илаһи азан тавышы яңгыраган яңа мәчет изге җомга көнендә авыл халкын иман нурын иңдерергә чакыра. Олысы да кечесе дә бүген Аллаһ йортына ашыга.
Моннан бер ел элек булачак мәчетнең нигезенә дога кылына. Бер ел төзелеш эшләре бара. Урыны да очраклы гына сайланмаган. Бу иганәче, Буа яктшлык җәмгыяте әгъзасы Марс Алиевның туган нигезе.
350 елдан атык тарихы булган Иске Тинчәле авылын динле халык дип ышанып әйтергә була. Авыл зур – 300гә якын кеше яши. Элек тә биредә 6 мәчет эшләп килгән. Бүгенгесе көндә бу авылның икенче мәчете.
Данлыклы шәхесләрнең исемен мәңгеләштерү максатыннан, мәчеткә ТАССРның Халык комиссарлары советы рәисе булып эшләгән Кыям Абрамов исеме бирелә.
Мәчетнең гомуми мәйданы 120 квадрат метр, биеклеге 27 метрны тәшкил итә. Проект авторы – тамырлары белән шушы нигездән чыккан архитектор Рөстәм Гыйлметдинов. Төзелеш эшләрендә Иске Тинчәлеләр һәм Буа якташлык җәмгыяте вәкилләре бик актив катнашкан. Бүген аларның һәрберсенә рәхмәт әйтелде.
Казандагы Мәрҗәни мәчете имам-хатыйбы Мансур хәзрәт Җәләлетдинов тарихка күз салып, Марс Алиевны меценат Ибрахим Юнысов белән чагыштырды. Заманында ул да бит мәчет салдырып, Шиһап Мәрҗәнине хәзрәи итеп билгели. Кыям мәчетенә исә имам итеп Хадиятулла Вазыйх улы билгеләнде.
Тантаналы ачылыштан соң, авыл халкы яңа мәчеттә беренче өйлә намазын укыды.
Айзилә Батырханова, Никита Граханцев, Татарстан яңалыклары
