Казандагы Иске таш мәчетенә реставрация ясала. Россия Федерациясе Дәүләт Думасы депутаты Илдар Гыйльметдинов изге йортны яңарту проекты буенча киңәшмә үткәрде.
Иске Таш мәчете төзелүгә ике гасырдан артык вакыт узган. Совет чорында аны мех фабрикасы склады буларак та файдаландылар. Бөек Ватан сугышы елларында вакытлы госпиталь сыйфатында авыруларны кабул итте. Шуңа да карамастан, мәчетнең манарасы, диварлары сакланган. Искергән бинаны реставрацияләргә булганнар. Мәчетнең икенче каты ир-атларга, беренче каты хатын-кызларга дини йолаларны үтәүгә билгеләнгән. Изге йортның элеккеге фотосүрәтләре, документлары сакланган, Шулар нигезендә төзекләндерү проектын әзерләгәннәр. Моның өчен Федераль бюджеттан 143 миллион сум акча бирелә, реставрация 2023 елда тәмамланыр дип көтелә.
