Теманы дәвам итәбез. Быелгы һава шартлары яшь игенчеләргә дә зур сынау. Кыска игеннәрне түкми-чәчми урып-суктыру тәҗрибәле комбайнчылардан да осталык таләп итә. Сарман агррар көллияте студентлары өчен дә уракта катнашу – зур тәҗрибә мәктәбе булды. Яшь игенчеләрнең кайберләре “Хезмәт кешесен данлыйбыз” республика конкурсында җиңеп чыгуга дәгъва кыла. Алар янында хәбәрчебез дә булып кайтты.
Комбайн штрувалында-Сарман аграр көллияте укучылары. Бу егетләр өченче курска күчкән. Техника белән идарә итү теориясен яхшы беләләр, ә җәен уракта катнашып, белемнәрен практик күнекмәләр белән ныгыталар.
Янәшәдге кырда чәчүгә туфрак әзерлиләр. Җирне ничек сөрергә, нинди технология отышлы – практикада өйрәнәләр.
Укытучылар белемнәрне тикшерүдә төрле алымнарны куллана. Студентларны төзек булмаган тракторда да эшләтеп карыйлар. Илһам Мөхәммәтҗанов колледж директоры күзәтүендә үткәргечләрне тоташтыра, детальләрне көйли, двигательне эшләтеп җибәрүгә әзерли.
Норматив буенча урта махсус уку йортында укучылар полигонда күнекмәләр узарга тиеш. Ә көллиятнең моның өчен үз комбайннары, үз кыры бар.
Техник-механик белгечлеген үзләштергән яшьләрнең байтагы укуларын Казан аграр университетында дәвам итә. Югары белем алуга өч ел вакыт бирелә.
СНХ Зөбәер Әһлетдинов Сарман аграр көллияте директоры
Тиздән яңа уку елы башлана. Башлап укучылар агроинженерия нигезләрен үзләштерергә, тренажерларда танып-белергә әзерләнә. Ә өлкәнрәк егетләр яшь комбайнчыларның «Хезмәт кешесен данлыйбыз» дигән 13 нче республика конкурсының финалына чыгарга дәгъва итә. Конкурсны «Татарстан» Дәүләт телерадиокомпаниясе, авыл хуҗалыгы һәм азык-төлек министрлыгы, шулай ук Казан дәүләт аграр университеты үткәрә. Җиңүчеләрнең исемнәре сентябрь ахырында билгеле була.
Дмитрий Второв, Ленар Хәбибуллин, Илдар Сафиуллин, Татарстан яңалыклары, Сарман районы.
