Татарстан спорт ареналарын төзүдә дөньяның алдынгы тәҗрибәсенә таяна. Киләсе елда Казанда гольф уены академиясен төзергә җыеналар, ул Швейцария архитектурасына нигезләп корыла. Көн саен бер мең биш йөзләп кешегә яраткан спорт төре белән шөгыльләнү мөмкинлеге туа. Яңа проект белән хәбәрчебез дә кызыксынды.
Киров районындагы бу матурлыкка киләсе елда тагын бер күркәм обьект өстәлергә тиеш. Елга буендагы 73 гектар мәйданда гольф уенын үстерү үзәген салуга керешәләр.
Бу Татарстанда гольф уйнарга мөмкин булган икенче урын була. Ябык зонада ел әйләнәсенә шөгыльләнү мөмкинлеге туа. Тик әлегә болар проектта гына. Чынлыкта төзелешнең башлангыч этабы.
Проект архитектурасы өчен Швейцария компаниясе белгечләре җаваплы. Алар дөньяның иң яхшы гольф-ареналарын төзүдә катнашкан. Әлеге тәҗрибә Татарстанда уникаль проект булдырырга ярдәм итә.
Иң мөһиме-биредә профессионаллар гына түгел, ә һәвәсккәр спортчылар һәм балалар да шөгыльләнә ала. Билгеле булганча, гольф – Олимпия спорт уены төре. Кем белә, булачак чемпионнарны нәкъ менә шушы мәйданда үстерерләр.
Вадим Струминский, Дамир Мөхәммәтханов, Татарстан яңалыклары.
