Казан шәһәренең «18нче номерлы Үзәк шәһәр клиник хастаханәсе»нә Россия федерациясенең һәм Татарстан республикасының атказанган табибы, Камил Зыятдинов исеме бирелде. Бу хакта Татарстанның сәламәтлек саклау министры Марат Садыйков мемориал такта ачу тантанасында хәбәр итте. Тантаналы чарадан хәбәрчебез Мөршидә Җиһан репортажы.
Бу капкадан Камил Зыятдинов атлап кермәгәнгә шактый еллар узса да, аның истәлеге булып урмансыман үсеп киткән кедр агачлары каршы ала. Аны ял итәргә килүчеләр дә тантаналы чара башланыр алдыннан шуңа игътибар итте.
Һәр яктан яшеллек, чәчәкләр эчендә күмелеп утырган сәламәтләндерү бинасы заманында раидиоприбор заводы эшчеләренә медицина хезмәте күрсәтү оешмасы була, Ә Камил Зыятдинов аны күптармаклы заманча хастаханә комплексы итеп төзетә.
«Ул — легенда, сәламәтлек саклауны оештыру титаны, Россиянең һәм Татарстанның атказанган табибы, җәмәгать һәм сәясәт эшлеклесе, берничә буынны тәрбияләгән мөгаллим», — дип сөйләде тантаналы чараны ачып җибәргән Марат Садыйков. Шулай ук Камил Зыятдинов төзегән һәм лаеклы коллектив җыйган 18нче хастаханәгә аның исеме бирелүен дә әйтте. Ә бу инде хезмәтенә күрә хөрмәт дигән сүз, чөнки кайбер кирпечләрен үзе салды дип тә искәртте чыгыш ясаучылар.
Әлеге хастаханә 1991 елдан 2002 елга кадәр Казан шәһәре Идел буе районы медицина хезмәтенең төп таянычы була. 1994 елдан 2016 елга кадәр хастаханәне Рөстәм Бакиров җитәкли.
1994 елда 18 нче шәһәр шифаханәсе клиник статусын ала, ягъни авыруларны стационар дәвалау белән беррәттән уку һәм фәнни эш алып барыла торган дәвалау учреждениесенә әверелә. Утырткан агачлары кебек үк үзе нигез салып калдырган клиник хастаханә дә гел үсештә.
Камил Зыятдинов Татарстан сәламәтлек саклау министры итеп билгеләнгәч, аның җитәкчелегендә Татарстанда яңа медицина технологияләрен гамәлгә кертү һәм республика сәламәтлек саклау өлкәсенә инвестицияләр җәлеп итү буенча күп санлы проектлар гамәлгә ашырыла, табиб амбулаторияләре һәм тәүлек буена эшләүче ашыгыч медицина постлары челтәре үсеш ала, медицина персоналын өзлексез рәвештә һөнәргә өйрәтүнең бердәм системасы булдырыла, Бөтендөнья сәламәтлек саклау оешмасы белән хезмәттәшлек урнаштырыла. Ә 2007 елдан ул фәнни юнәлешне әйдәп баручы буларак, Казан дәүләт медицина академиясе ректоры итеп сайлана.
Тормышны без еш кына юл белән чагыштырабыз, юллар төрле була. Җитәкчелек иткән чорларда Камил Зыятдиновка да төрле юлларны кичәргә туры килгән, сикәлтәсен дә, кискен борылыш алганнары да булган, әмма ул кешелеклелек дигән кыйбласына гомере буе тугры калды. Туган төбәкне кайгыртып яшәүне дә ул үз бурычы итеп санады .
1978 елда Казан медицина институтын тәмамлаганнан соң Камил Зыятдинов хезмәт юлын Буа үзәк дәваханәсендә хирург-травматолог буларак башлый. Соңрак поликлиника мөдире булып күчерелә. Туган төбәгендә дә аның исемен йөртүче урам бар, ул эшләгән дәваханәдиварына да истәлек тактасы беркетелгән. Болар барысы да Азат Айзатуллов Буа районы башлыгы булап эшләгәндә гамәлдә куелды.
Уңышка бер селтәнүдә генә ирешү мөмкин түгел, аңа якутлардай кыйммәт вакыт һәм тырышлык кирәк. Россия Федерациясенең һәм Татарстан Республикасының атказанган табибы, медцина фәннәре докторы, профессор дәрәҗәсенә ирешүгә тәүге сукмак Әлки авылыннан, Әтисе Шәһәретдин, әнисе Шәмсебанаттан башлана. 9 балалы гаиләдә үстек, энем алтынчысы иде дип искә ала абыйсы Раил.
Камил Зыятдиновның кызы Динә Хөсәенова да һәркемгә рәхмәт белдерде. Динә ханым да әтисе юлыннан киткән, хәзер ул Республика клиник офтальмология хастаханәсен җитәкли.
Бер чәчәк белән җәй булмый дибез, ә медицина өлкәсендә бер кешенең зирәк акылы һәм табигать бүләк иткән талантлы могҗизалар ясарга сәләтле. Мемориаль такта ачу тантанасы башланыр алдыннан әллә генә каян бер болыт чыгып ләйсән яңгыр явып үтте. Искә алу чараларында явым-төшемне яхшыга юрый борынгылар.
Мөршидә Җиһан,Таһир Хәсәнов, Татарстан яңалыклары.
