Дәүләт Советында Экология, табигатьтән файдалану, агросәнәгать һәм азык-төлек сәясәте комитеты башлыгы Азат Хамаев уздырган матбугат конференциясендә шәхси ярдәмче хуҗалыкларга дәүләт ярдәме турында сүз барды.
Бу хакта закон 5 ел элек кабул ителгән иде. Шәхси хуҗалыкларда мөгезле эре терлекләр саны саклап калынды. Республика казнасыннан ел саен кече хуҗалыкларга булышу өчен шактый акча бүлеп бирелә. Иң кирәкле ярдәм чарасы — сөтчелек кече фермаларын төзү. Әлеге программа ярдәмендә шәхси ярдәмче хуҗалыкларда 7 мең баш терлек арткан.
Азат Хамаев профильле комитетның беренче яртыеллыктагы эшенә йомгак ясады. Парламентта берничә төп закон тикшереп, кабул ителде. Алар органик продукция җитештерүгә ярдәм итүгә, хайваннарга мөнәсәбәт, экологик һәм җир Кодексларын үзгәртүгә кагыла. Азат Хамаев күптән түгел узган «Агроволга — 2021» агросәнәгать күргәзмәсе турында да фикерләре белән уртаклашты. Форумда ачык һавада авыл хуҗалыгы җитештерүчеләренең масштаблы экспозициясе тәкъдим ителде, заманча мәйданчыкларда эшлекле форум узды.
