Бүген Казанда Сабан туенының берсе Аккош күле янындагы урманда узды. Кыр бәйрәме кунакларын Татарстан Дәүләт Советы Рәисе һәм республикага эш сәфәре белән килгән Тываның Югары Хурал Рәисе Кан-оол Даваа сәламләде. Бу хакта республика парламентының матбугат хезмәте хәбәр итә.
Аккош күлендәге Сабантуен Габдулла Тукай әкиятләре буенча төзелгән театраль пролог белән ачтылар. Сәхнәгә татар халык җырларын башкаручылар да чыкты.
Фәрит Мөхәммәтшин бәйрәмгә җыелган кунакларга мөрәҗәгать итте. «Сабантуй — безнең милли байлык. Анда татар халкының үзенә генә хас булган мәдәнияте, гореф-гадәтләре һәм халыкның хезмәт сөючәнлеге чагыла. Ул буыннар бәйләнеше үрнәге, кешеләрнең үзара аңлашып яшәвен, рухи бердәмлеген күрсәтә», — диде Дәүләт Советы Рәисе.
Шулай ук Фәрит Мөхәммәтшин Татарстан Президенты Рөстәм Миңнехановның котлавын да укыды. Анда Сабан туе «татар халкы мәдәниятенең алыштыргысыз өлеше, үткәнебез, хәзергебез һәм киләчәгебез арасында җанлы бәйләнеш» диелә.
Сабан туе уңаеннан Аккош күлендә күңел ачу чаралары кичкә кадәр дәвам итә.
