Парламент хәбәрләрен тәкъдим итәбез. Алар белән Гөлназ Ибраһимова таныштырыр.
Дәүләт Советы парламентара элемтәләрне ныгытуны дәвам итә. Күптән түгел Казанда Саха (Якутия) Республикасы парламент делегациясе булып китте. Ә узган атнада безгә Иркутск өлкәсе парламентарийлары килде. Алар Дәүләт Советы эше белән танышты, Фәрит Мөхәммәтшин белән очрашты.
Республика парламентында Татарстан Дәүләт Советы һәм Иркутск өлкәсе Закон чыгару Җыены арасында хезмәттәшлек турында килешү имзаланды.
Кунаклар башта фракцияләр, депутатлар төркемнәре, профильле комитетлар һәм комиссияләр эшчәнлеге белән танышты. Аларга парламент үзәген, музеен, рәсми делегацияләр кабул итү залларын, турыдан-туры трансляцияләүне, журналистларның эш мөмкинлекләрен күрсәттеләр. Очрашуда Фәрит Мөхәммәтшин искәрткәнчә, 2017 елда Татарстан белән Иркутск өлкәсе арасында сәүдә-икътисадый, фәнни-техник, социаль һәм мәдәни өлкәләрдә хезмәттәшлек итү турында хөкүмәтара килешү имзаланган. Ә яңа Килешү закон чыгару, Дәүләт төзелеше һәм җирле үзидарә өчен яңа мөмкинлекләр ача. Хәзердән башлап парламентарийлар законнар өчен яңа идеяләр алмаша, шулай ук федераль парламентка инициативалар белән мөрәҗәгать итү өчен бердәм фикер туплыйлар.
