Июнь — Сабан туйлар ае. Авыл-район бәйрәмнәре эзенә басып Театраль Сабан туй килә. Театраль сабантуйның тарихы 2005нче елга барып тоташа. Әлеге бәйрәм Кәрим Тинчурин исемендәге Татар дәүләт драма һәм комедия театры тәкдиме белән Татарстан Президенты Татарстан һәм Мәдәният Министрлыгы ярдәме белән уздырыла башлый. Быелгы бәйрәм Апас районында узды. Театраль сабантуй батыры кем? Бу сорауга әлеге сабантуйда катнашкан хәбәрчебез Ләлә Зәйнуллина җавап бирер.
Иртәдән үк кыздырып-яндырган кояш астында Сабан туй мәйданыннан Тинчурин, «Әкият», Кариев, Чаллы, Минзәлә, Түбән Кама, Буа, Әтнә театры коллективлары уза. Сабан туйны Апас районы башлыгы Равил Хисаметдинов, Татарстан Президенты карамагандагы Мәдәниятне үстерүгә ярдәм фонды башкарма директоры Нурия Хашимова һәм Театр сабантуеның идея авторы, Тинчурин театры директоры Фәнис Мөсәгыйтов сәламләде.
Матур бер гадәт буенча Сабан туй әләмен төрле елларда театр Сабан туеның батыры булган артистлар күтәрә. Бүген алар Тинчурин театры артистлары Алмаз Фәтхуллин, Харис Хөснетдинов иде.
Театр җәмәгатьчелеге өчен беренче Сабан туе Биектау районының Әлдермеш авылында үткәрелә. Төрле елларда театрлар Сабан туе Саба, Арча, Питрәч районнарында, Казан, Чаллы, Буа шәһәрләрендә узды.
Театраль сабантуй Татарстан дәүләт театрлары арасындагы иҗади элемтәне, бердәмлекне ныгыту, милли бәйрәм Сабан туен популярлаштыру, татар халкының гореф-гадәтләрен саклау үрнәге.
Бер калыпка салынган тамаша бәлки алдагы елларда башка форматта узар.
Артистлар берсен-берсе уздыра. Сәнгать әһелләре кашыкка йомырка кабып йөгерә, гер күтәрү, капчык киеп йөгерү, чүлмәк вату, милли көрәш кебек традицион уеннар белән беррәттән, бию марафоны, эстафета кебек үзенчәлекле ярышларда көч сынаша. Тамашачыларга, артистларның үзләренә дә бию аеруча ошады. Тәмам аяктан егылганчы бирешмәде Кариев театры артислары Алсу белән Булат .
Бәйрәм күрке — көрәш ярышлары бик кызу узды. Баш батыр булып Минзәлә драма театрыннан Нәфис Гайфуллин танылды. Тәкәдән кала, кыйммәтле бүләк – автомобильгә ия булды ул.
Киләсе елга театр Сабантуен Минзәләдә уздыру планлаштырыла.
Ләлә Зәйнуллина, Таһир Хәсәнов, Татарстан яңалыклары өчен Апас районыннан.
