Җәйге чорда, бигрәк тә эсседә, еланнар үрчи. Шуңа да куе үләнле, ышык урыннарда еланнардан сак булыгыз. Куркыныч очрашуны кисәтеп буламы? Киләсе язмабыз шул хакта.
Бу ханым әле дә куркуыннан арынмаган. Чакырылмаган кунак белән хуҗабикә үз йортында каршылаша. Өйгә шуып кергән кара елан суыткыч астына яшеренгән. Хуҗабикә аны үтерергә маташа, ләкин киресенчә килеп чыга, табиблар хатынның үзен үлемнән коткара.
Елан чаккан ханым хастаханәдә тагын берничә көн дәвалана . Табиб әйтүенчә, тулысынча сәламәтләнү өчен бер айга якын вакыт китәчәк. Еланнарның активлыгын белгечләр парлашу, аталану чоры башлану белән аңлата. Бу вакытта елан аеруча куркыныч.
Сез йөри торган урманда кара еланнар булуы турында ишетсәгез, әкренрәк йөрергә кирәк. Шул вакытта гына елан шуышып китәргә өлгерәчәк. Тешләгән очракта каударланмый гына ашыгыч ярдәм табибларын чакыртырга һәм күп итеп су эчәргә кирәк.
Бик тиз арада табибка мөрәҗәгать итәргә кирәк . Коры тукыма белән бәйләп куярга ярый. Тешләгән урыннан агуланган канны сытып чыгарырга аз гына җәрәхәтне ачырга кирәк. Әмма авыз белән сурырга катгый рәвештә тыела.
Кулланучылар хокукларын яклау һәм кеше иминлеге өлкәсендә күзәтчелек федераль хезмәте мәгълүматлары буенча, соңгы вакытта елан чагу очраклары ешайган. Мамадыш районында гына да елан чаккан 2 кеше табибларга мөрәҗәгать итте.
Гөлинә Гыльмуллина, Алмаз Камалеев, Татарстан яңалыклары.
