Алып баручыга- «ШАЯН ТВ» каналы балаларны кечкенәдән татарча уйларга, сөйләшергә өйрәтә, татар мәдәниятен саклау һәм үстерүгә зур өлеш кертә. Бу уңайдан Татарстан Президенты каршындагы татар телен саклау һәм үстерү мәсьәләләре комиссиясе ярдәме белән «ШАЯН ТВ» каналы оештырган «Балачак җыры» бәйгесе аерым игътибарга лаек. Аның максаты татар телендә балалар өчен җырлар иҗат итүче шагыйрь һәм композиторларны барлау, шул җырларны таныту, балалар репертуарын татар җырлары белән баетудан гыйбарәт. “Балачак җыры” 2021 бәйрәмен безнең хәбәрчебез Фәннур Хәсәнов тә күреп кайтты.
Бәйрәм урамнан ук башланды. Кунакларны “Шаян ТВ” үзенең ишек алдында “Балалар Сабантуе” күренешләре белән каршы алды. Уйнадылар, көлделәр, җырладылар, биеделәр, дигәндәй, кашыкка йомырка куеп та чаптылар, күз бәйләп үзеңә бүләк кисеп алу да, көрәш мәйданчыгында да көч сынашулар –барысы да шатлык билгесе. Ишекалды мәйданчыгы гөр килде. Киләчәктә әлеге балаларны халкыбыз горурлыгы булган зур Сабантуй мәйданнарында күрергә насыйп булсын.
Быел «Балачак җыры 2021 » бәйгесенә 110 җыр килде. Бу узган елгыдан ике тапкырга күбрәк! Иң яшь катнашучыга 23 яшь булса, иң өлкәненә 90 яшь! Профессиональ композиторлар, танылган шагыйрьләр белән беррәттән бәйгедә үзешчәннәр дә катнашты. Арада төрле һөнәр ияләре бар. Табиблар, укытучылар, фән эшлеклеләре, тәрбиячеләр һәм башкалар. Катнашучыларның географиясе дә киң. Үз иҗат җимешләрен Татарстан гына түгел, Мәскәү, Чиләбе өлкәсе, Башкортстан, Удмуртия, Чувашиядә яшәүче милләттәшләребез дә җибәрде.
Әйтеп үтү урынлы булыр, узган ел «ШАЯН ТВ» телеканалы үткәргән бәйгедә 5 җыр җиңүче дип табылды. Аларның барысына да заманча аранжировка ясалды, сыйфатлы видеоклиплар төшерелде. Җырларны “Казан нуры” халык уен кораллары оркестры, Малайлар капелласы хоры белән берлектә «Сәйлән» фестивале җиңүчеләре башкарды. Җырларның тексты һәм ноталары «Көмеш кыңгырау» газетасы, «Сабантуй» журналында урын алды. Бүгенге көндә әлеге җырларны балалар да яратып башкара! «Сәйлән» фестивале моңа ачык дәлил. Барлык җырлар республикабызның музыка мәктәпләренә дә таратылды.
Жюри ике составта эшләде. Беренче төркемдә профессионаллар, ягъни әдәбият, сәнгать, музыка, педагогика өлкәсендә югары дәрәҗәләргә ирешкән шәхесләр булса, икенче төркемдә – балалар: музыкаль бәйгеләр лауреатлары, ШАЯН ТВ каналы алып баручылары, блогерлар. Икенче турга Жюри иләгеннән 20 җыр үтте. Бу этапта иң лаеклыларны сайлауга тамашачылар да җәлеп ителде. Үзләре ошаткан җырлар өчен сайтта тавыш бирделәр. Интернет аша тавыш бирү юлы белән, 10 җыр 3 нче турга узды. Җырның канаты бар дип юкка гына әйтмиләр! Балачак җыры һәр күңелдә яңгырасын!!!
Фәннур Хәсәнов, Таһир Хәсәнов, Наилә Нәҗипова Татарстан яңалыклары.
