Идел елгасы белән әйләндереп алынган Свияжск шәһәре һәрвакыт тарихчылар һәм сәяхәтчеләрнең игътибар объекты булып тора. Җимерелми калган чиркәүләр һәм монастырьлар — вакыйгалар шаһиты, ә шәһәрнең төп мәйданнары — урта гасырлар көнкүрешенең тулы бер музее. Тынлыкка күмелгән Свияжск утрау-шәһәре бәйрәмнәрдә һәм фестивальләрдә җанланып китә. Монда еш кына урта гасырлар рухындагы халык бәйрәмнәре һәм традицион чәй эчүләр, театраль лабораторияләр оештырыла, музыка фестивальләре уздырыла, ә шәһәр буйлап борынгы киемнәр кигән һөнәрчеләр һәм фольклорчыларның узуы бәйрәмнәрне тагын да ямьләндереп җибәрә. Утрау-шәһәр матурлыгы рәссамнарны һәм шагыйрьләрне дә үзенә тарта. Кичә генә Свияжск шәһәр-утраучыгында «Вербицы сад» — «Бәрмәнчек бакчасы» 3 енче республика керәшен православ мәдәнияте фестивале гөрләде. Барлык карендәшләрне керәшеннәрнең йөзек кашы булган «Бәрмәнчек» дәүләт фольклор ансамбле үз «бакчасына» җыйды. “Бәрмәнчек бакчасында” хәбәрчебез Фәннур Хәсәнов та хозурланып йөрде.
Быел фестиваль 3 тапкыр оештырылды. Әйтеп үтәргә кирәк, Татарстаннанның бик күп авыл калалаларыннан һәм тирә –күршеләрдән дә әлеге фестивальдә катнашырга теләк белдерүчеләр шактый булды һәм һәрберсе үзләренең кабатланмас репертуарлары белән килделәр.
Казан каласыннан, Чистай, Зәй, Кайбыч, Мамадыш, Кукмара, Түбән Кама, Питрәч районнарыннан матур төркемнәр. Олы яшьтәге түтиләрдән кала, республиканың төрле балалар коллективлары да фестивальдә иман җырулары җырладылар. Һәрбер якның үз көе, сүзләре, ләкин алар барысы да Алланы зурлау, данлау. Бүтән беркемдә дә булмаган, уникаль җырулар яңгырады.
«Бәрмәнчек» ансамбле егет һәм кызлары — фестивальнең хуҗалары — бәйрәмнең иң матур бизәкләре. Аларның иман җырулары күңел кылларын тибрәтә, биюләре йөрәкләрне җилкендерә.Чынлап та, Свияжск утраучыгында “Бәрмәнчек бакчасы” чәчәк атты. Катнашучыларның барысына да Диплом белән истәлекле бүләкләр тапшырылды.
Фәннур Хәсәнов, Ирек Хәмидуллин, Кәдрия Мерсиапова -Татарстан яңалыклары.
