Казанда алтынчы Бөтендөнья татар хатын-кызлары форумы узды. Аны “Ак калфак” иҗтимагый оешмасы Бөтендөнья татар конгрессы Башкарма комитеты белән бергәлектә оештырды. Җыенда чит иллләрдән, Россиянең 49 төбәгеннән һәм Татарстан районнарыннан өч йөзгә якын татар хатын-кызлары катнашты. Озак вакыт күрешмәгәнгә, Казанга бик сагынып килгәннәр. Хатын-кызлар җыенында хәбәрчебез Айзилә Батырханова да булып кайтты.
“Хатыннар! Атлагыз алга! Бу юлда шаула, матбугат!” Бу юллар сөекле шагыйребез Габдулла Тукайның “Хатыннар хөррияте” шигыреннән. Ул аны 1909нче елда “Яшен” газетасында бастыра. Бөтендөнья татар хатын-кызлары форумында катнашучылар беренче эш итеп Габдулла Тукай музеенда булдылар, “Без Тукайлы халык” дисскусион мәйданчыгында катнаштылар.
СНХ Кадрия Идрисова “Ак калфак” Бөтендөнья татар хатын-кызлары иҗтимагый оешмасы рәисе
Җыенда бүгенге вәзгыятьтә аеруча актуаль булган милли гаилә, балаларга дөрес тәрбия бирү кебек мәсьәләләр күтәрелде. Очрашу урыны итеп Адымнар күптелле мәгариф комплексын сайлаганнар. Биредә белем алучы беренче сыйныф укучылары “Әбиемнең күңел сандыгы” дип исемләнгән чыгыш әзерләгән. Сабыйлар милли гореф-гадәтләребезне күрсәтте.
Заманча белем бирү шартларында милли үзаңны үстерү мөһим мәсьәлә. Адымнар мәктәбенең бу юнәлештә башкарган эшләре уңышлы. Мәктәп директоры Айдар Шәмсетдинов: “Адым – ул хәрәкәт дигән сүз. Адымнар мәктәбе укучысы – ул гел хәрәкәттә һәм эзләнүдә булан шәхес. Без балаларда максатчанлык һәм үз мөмкинлекләренә ышаныч тәрбиялибез” дип билгеләде.
Форумда катнашучылар милли тәрбия бирү мәсьәләсендә фикер алышты.
Хатын-кызлар заманча технологияләр кулланып дәресләр үткәрү өчен барлык кирәкле җиһазларга ия булган кабинетларны карадылар, шулай ук Аяз Гыйләҗевка багышланган мәктәп музеенда булдылар, хәзерге заман шәхес хатын-кызлары турында “Гомер хәситәсе” фильмын карадылар.
Форумның икенче көнендә Чулпан мәдәни үзгендә Калфак туе булды. Татар хатын-кызларының кул эшләнмәләре күргәзмәсе эшләде.
Гаҗәеп гомер дисбесе дип исемләнгән чара ислам яңаруына зур көч салган мөгаллимә Рәшидә абыстай Исхакыйның якты истәлегенә багышланды.
Милләтнең нигезе – гаилә, гаиләнең нигезе – хатын-кыз. Форумда Татар гаиләсе дәрәҗәсен күтәрү максатыннан, милли тормыш нигезләрен, халкыбызының йолаларын, гореф-гадәтләрен, гаилә кыйммәтләрен кайтару буенча эшчәнлекне дәвам итәргә кирәклеге ассызыкланды.
Айзилә Батырханова, Ирек Хәмидуллин, Таһир Хәсәнов, татарстан яңалыклары.
