Күпмилләтле Татарстанда халыкчан бәйрәмнәр шактый. Алар арасында рус мәдәниятенең җыр-йолалы үзенчәлекле гәүдәләнеше булган Каравон даны республикабыз чикләрен узып, Россия күләмендә дә танылган. Узган ел онлайн-форматта үткәрелгәнгә, күрәсең, халык быел аеруча тансыклаган. Конфессияара һәм милләтара татулык бәйрәменең ничек узганын хәбәрчеләребез дә күреп кайтты.
Буыннар арасындагы бәйләнешне, мәңгелек рухи хәзинәләрнең әһәмиятен ачыклый торган Каравон фестиваленә быел бөтен Россиядән 160тан артык фольклор коллективы килгән.
Каравонның хөрмәтле кунагы Татарстан Республикасы Президенты Рөстәм Миңнеханов булды.
Никольскийга шулай «Валдай» дискуссия клубының Үзәк Азия конференциясендә катнашучылар һәм башка кунаклар килде. Аларны Лаеш районы башлыгы Илдус Зарипов озатып йөрде.
Алай гына да түгел районы башлыгы мәйдан уртасында бию осталыгын да күрсәтте.
Оештыручылар бәйрәм кунаклары өчен рус халык уеннары, рус хәрби сәнгатенең традицион төрләре, остаханәләр һәм мәдәният әһелләре катнашында күңел ачу программасы әзерләгән иде.
Лаеш районының Никольский авылында бәйрәмнең инде өч йөз елдан артык тарихы бар һәм ул авылның төп бәйрәме — Могҗизалар тудыручы Николай көненә— «Никола-Вешний»га багышланган
“Каравон” — тамашачылар өчен рус халкының җырлау сәнгате, милли уеннары, аш-су үзенчәлекләре, көнкүреше, милли киемнәре белән танышу, гомумән, традицион һәм заманча рус мәдәниятен аңлау өчен менә дигән мөмкинлек.
Алия Галиуллина, Ринат Сәхибгәрәев, Татарстан яңалыклары.
