Кирәк икән заманча һәм ретро җырлар, кирәк икән радиоспектакльләр — тыңлаучыга киң сайлау мөмкинлеге бар. Тарихта беренче тапкыр татар телле радиостанция җитәкчеләре милли радио үсеше, проблемалар һәм киләчәккә планнар турында түгәрәк өстәл артына утырып сөйләште. Тулырак хәбәрчебез әзерләгән видеоязмада.
Радионың кайда яңгыравы мөһим түгел, милли радио өчен контент, ягъни эчтәлек мөһимрәк. Илшат Әминев сүзне әнә шуннан башлады.
Соңгы елда милли радиолар саны артты. Һәр тыңлаучы күңеленә хуш килгән ешлыкка кушыла. “Татарстан” радиосы һәм “Татарстан авазы” интернет радиосы милли ядкәрьләребезне яңгырата. Алтын хитлар Болгар радиосы дулкыннарында, заманча җырлар — Татар радиосында. Шигърият яратучылар өчен Татарстанда Китап радиосы барлыкка килде. Алга таба радиода әдәби-мәдәни, фәнни-популяр һәм тарихи тапшырулар күләме арттырылачак дип бүлеште радионың баш мөхәррире Алмаз Миргаязов.
Тәртип радиосы халыкка кире кайтты. Хәзер аны 93,1фм ешлыгында Казанда, 90,2 фм ешлыгында Чаллыда тыңлап була. 7 май Радио көнендә яңа йортлы да булдылар. Тәртип радиосы студиясен ачарга, радиотыңлаучыларны туры эфирда сәламләргә Татарстан Президенты Рөстәм Миңнеханов үзе килде.
Милли радио эшчәнлегендә тагын бер проблема – кадрлар мәсьәләсе.
Алга таба интернет һәм цифр мәйданчыкларында урнашу өчен бердәм милли радиоплеер булдыру максаты тора. Бу исә милли радио тыңлаучылар санын тагын да арттырачак.
Айзилә Батырханова, Ирек Хәмидуллин, Татарстан яңалыклары.
