«Республикабызның төрле авыл, шәһәрләрендә иҗат белән шөгелләнүче һәвәскәр авторлар бик күп. Алар үзләре өчен генә җыр һәм көй язгалый, ләкин зур аудиториягә чыгармый. Күптән түгел генә, шундый талантлы авторларны халыкка, популяр җырчыларга таныту максатыннан өченче „Яшь йөрәкләр“ бәйгесе булып узды. Бәйге берничә этапта оештырылды һәм иң-иңнәре “Юность” Мәдәният сараенда очрашты. Безнең хәбәрчебез Фәннур Хәсәнов үзешчән сәнгатькәрләрнең өр –яңа җырларын тыңлап кайтты, тулырак мәгълумат киләсе язмада.
Бәйгедә барлык Идел буе регионыннан үз телләрендәге җырлар белән талантлы җыр башкаручылар һәм авторлар катнашты. Гариза җибәрүчеләр арасында Россиянең кайбер төбәкләреннән, хаттә чит илләрдән килгән вәкилләр үзләренең иҗат җимешләре белән тамашачыларны шатландырдылар.«Бәйгедән куркырга кирәкми, чөнки без профессионаллардан һәм танылган авторлардан гаризалар кабул итмибез. Максатыбыз — җырга уңай яки тискәре бәя бирү түгел, ә талантлы кешене интернет, радио, телевидение аша халыкка күрсәтү», — диде Җәүдәт Гыйльманов, сүз башында
Сәләтле җыр авторларын табу, аларны үзара очраштыру максатыннан “Яшь йөрәкләр” проекты быел өченче тапкыр уздырыла. Биредә үзләре язган җыр белән композиторлар һәм текст авторлары катнаша алды. Ләкин “Яшь йөрәкләр” – конкурс түгел, ә фестиваль. Лауреатларга тавыш яздыру студиясеннән сертификатлар бирелә, әлеге авторларның җырларыннан торган җыентык та эшләнергә мөмкин. Шулай иткәндә генә әлеге җыр язучыларның тыңлаучысын да табар,-дигән өмет бар.
“Яшь йөрәкләр” бәйгесе проекты – энтузиастлар эше. Фестивальнең төп максаты- яңа талантлар табу, катнашучыларны рухи азык белән баету һәм бөтмәс-текәнмәс тәҗрибә туплау. Һәрбер катнашучының профессияләре дә төрле, иҗат юллары да. Шуңа да “Яшь йөрәкләр”бәйгесенең тагын бер мөһим максаты –катнашучыларга иҗатка дәрт бирү, өндәү, киләчәктә дә иҗат итергә канатландыру, рухландыру.
Фәннур Хәсәнов, Никита Граханцев. Татарстан яңалыклары.
