Татарстан Президенты Рөстәм Миңнеханов Габдулла Тукайның туган көнендә Арча районы Яңа Кырлай авылындагы музеенда иҗат зыялылары белән очрашты. Очрашуда бертөркем иҗат әһелләре үзләрен борчыган сорау-тәкъдимнәрен җиткерде. Арчадан хәбәрчеләребез репортажы.
Татарстан Президенты Рөстәм Миңнеханов Арча районы Яңа Кырлайдагы Габдулла Тукай дәүләт әдәби-мемориаль музей комплексында экспозиция белән танышты. Тукай һәйкәленә чәчәкләр салды. Габдулла Тукай дәүләт әдәби-мемориаль музей комплексында татар интеллигенциясе белән эшлекле очрашу барышында мөһим темалар күтәрелде.
Ркаил Зәйдулла Кырлайда Президентның иҗат әһелләре белән очрашуда әдәби тәрҗемә үзәген ачу идеясе белән чыгыш ясады.
Аның сүзләренчә, үзәк булса, татар язучыларының әсәрләрен башка телләргә тәрҗемә итү системалы төстә хәл ителәчәк.
Татарстан Президенты Рөстәм Миңнеханов әдәби тәрҗемә үзәген ачу идеясен хуплады.
Шагыйрь Зиннур Мансуров «Туган тел» шигыренә багышланган скульптур ансамбль төзерү тәкъдиме белән чыгыш ясады.
Рөстәм Миңнеханов: «Туган тел» скульптур композициясенә конкурс игълан итү мөһимлеген ассызыклады.
Татарстан Президенты Рөстәм Миңнеханов «Әкият» татар дәүләт курчак театры күбрәк балаларга өстенлек бирергә тиешлеген әйтте.
Габдулла Тукай тәнкыйть кирәкле шәйдер дип язып калдырган. Татарстан Президенты «Әкият» курчак театры бинасын тәртиптә тотмаганга мәдәният министры Ирада Әюповага шелтә белдерде.
Очрашудан соң Туган тел көненә һәм Габдулла Тукайның тууына 135 ел тулуга багышланган шигъри митинг узды.
Ләлә Зәйнуллина. Ирек Хәмидуллин. Татарстан яңалыклары. Арча районы.
