Республика яман шеш авырулары үзәгендә табиблар өчен яңа акция башлап җибәрделәр. Ковидка каршы вакцина ясаткан табибларга һәм медицина хезмәткәрләренә махсус күкрәк билгеләре тапшырыла. Үзәктә эшләүче персоналның 80 проценттан артыгы прививка ясаткан инде.
Хәзер республикада 100 меңнән артык яман шеш белән авыручы исәпләнә. Авыруны кичереп, диспансерда күзәтүдә торучылар ковид йогышына каршы прививка ясата ала. Шулай ук ярдәмче терапея курсларын үткән кешеләргә дә вакцина ясау өчен чикләүләр юк. Ә дәвалау этабындагы пациентларга өч айдан соң прививкага килергә рөхсәт бирелә. Яман шеш белән авыручыларның туганнарына да беренче чиратта вакцина узарга кирәк.
