Казанда юлларны төзекләндерү эшләре башланды. Беренче чиратта транспорт хәрәкәте күп булган Оренбург тракты, Миллениум күпере, Аракчино шоссесы, Дзержинский, Подлужная. Шулай ук шәһәрнең башка үзәк урамнары да төзекләндерелә.
Быел барлыгы 45 мең квадрат метрдан артык мәйданда юлларда барлыкка килгән чокырларны бетерү планлаштырыла. Моның өчен муниципаль бюджет 93 миллион сум акча бүлеп биргән. Ремонтланырга тиешле юлларны билгеләгәндә, белгечләр, заказчылар, район хакимиятләре, подрядчы оешмалар вәкилләре катнашында узган комиссия тикшерүе нәтиҗәләре исәпкә алынган. Транспорт хәрәкәтенә комачауламас өчен эшләр нигездә төнге вакытта оештырыла.
