Нәүрүз бәйрәме табигатьне нурга төреп. кешеләр күңелен балкытып, җиргә язны алып килде. Язның күркәм бәйрәме вакытында Казанда Нәүрүз гүзәлен дә ачыкладылар. Тулырак киләсе репортажда.
Озын салкын кыш айларының азагында Нәүрүз килә дигән сүзләр җылылыкка, яктылыкка сусаган кңелләргә ниндидер ошаныч өсти кебек. Әйе, кояш та туры карый, җылысын да җәлләмичә сибә башлый. Нәүрүз – борынгы әби-бабаларыбыз үткәргән язны каршылау бәйрәме ул. Мәгълүм булганча, 18 гасырга хәтле татар халкы Яңа елны март аеның 21 ендә — көн белән төн тигезләшкән вакытта каршы алган. Бу көн Иран календаре нигезендә “Нәүрүз” дип аталган. Иранда һәм аңа күрше илләрдә яңа елны хәзер дә март аенда каршы алу гадәте яшәп килә.“Нәүрүз” сүзе фарсы-таҗик телендә “Яңа көн” дигән мәгънәне аңлата. “Нәү” – яңа, “рүз” –көн дип тәрҗемә ителә. Борынгы бәйрәмне кешеләр атна буе дәвам иткәннәр. Һәркөннең үз гадәте, үз тәртибе, язылмаган кануннары булган: Бу көнне яшьләр, шәкертләр, балалар, өйдән-өйгә кереп, бәет, шигырь әйткәннәр, йорт хуҗасына исәнлек-саулык, иминлек-байлык, бәхет, уңышлар теләгәннәр. Шулай йөреп, алар кешеләрнең күңелләрен күтәргәннәр, асылда салкын кышлар бетеп килүгә бергәләшеп шатланганнар, язны каршылаганнар.Бу бәйрәмнең иң күңелле мизгелләренең берсе – Нәүрүзбикәне сайлау булган. Бу кыз – иң гүзәл, иң чибәр, бар яктан да уңган-булган булырга тиеш булган. Алар үзләрен тапкырлыкта, уңганлыкта сынаганнар. Анда алар халык җырларын башкаруда, милли бию осталыгында, милли ризык, халык ашларын әзерләүдә ярышканнар. Халыклар дуслыгы йортында үткәрелгән кичә дә нәкъ шуны ачыклады. Алда үткәрелгән турларда, бик күпләр арасыннан сайланып алынган гүзәл кызлар ярымфиналда тагын бер тапкыр сынау үттеләр. Соңгы сынау Казан халкы өчен зур мәйданда тәкъдим ителде.
Бәйрәм иртәнге якта башланып кояш баеганчыга кадәр дәвам итте. Язны зарыгып көтүчеләр өчен зур шатлык булды. Әйтеп үтү урынлы булыр; 2021 елның “Нәүрүз” гүзәле булып Казахстан кызы Карина Капдуллина танылды. Аннан соң Үзбәкстаннан Юлия Ким һәм Кыргызстан кызы Диана Забоевалар тамашачыларның алкышлауларына күмелделәр.
Фәннур Хәсәнов, Илдар Гәләветдинов, Камил Зәйнуллин- Татарстан яңалыклары.