Фатыйха Аитова исемендәге 12нче гимназия ел саен Укытучылар һәм укучыларның Туфан Миңнуллин исемендәге республика конференциясен үткәрә. Фәнни–гамәли чара татар әдәбиятын, мәдәниятен, сәнгатен һәм Туфан Миңнуллинның иҗади мирасын өйрәнү, алар аша яшь буында милли үзаң тәрбияләү максатыннан оештырыла. Конференциянең быелгысы катнашучылар күңеленә ничек итеп кереп калды? Туфан мәктәбе дип йөртелгән гимназия укучылары сынатмадымы? Сигезенче тапкыр уздырылган конференциядән хәбәрчебез Мөршидә Җиһан репортажы.
Зал тулы халык — Туфан абый тарафдарлары. Бирегә аның иҗатын, мирасын хөрмәт итеп килгән укучылар һәм укытучылар, дәүләт һәм җәмәгать эшлеклеләре җыелган.
Фатыйха Аитова исемендәге 12нче гимназия Туфан Миңнуллинга багышланган конференцияне Татарстан Дәүләт Советының мәгариф, мәдәният, фән һәм милли мәсьәләләр комитеты, шулай ук Мәгариф һәм фән министрлыгы, белән берлектә үткәрә.
Ак калфак оешмасы җитәкчесе Кадрия Идрисова фикеренчә , әлеге конференция көтеп алган , мәгънәви һәм тәрбияви чара.
Ел саен сәхнә түренә Туфан абыйның иң якыннары , хатыны Нәҗибә Ихсанова һәм Кызы Әлфия Миңнуллина күтәрелеп хәер-фатыйха бирә иде. Алар булмагач, быелгы конференциянең ачу өлешен күпме генә тантаналы итәргә тырышсалар да моңсу булды. Искә алуыбыз рухларына дога булып ирешсен дип искәртте чыгыш ясаучылар.
Җәмгыять һәм халык проблемаларына һәрчак игътибарлы булуын Туфан Миңнуллин матбугатта “Кызыл тышлы дәфтәр” һәм “Утырып уйлар уйладым” сәхифәләре аша да җиткерә иде. Шуңа да ел саен конферениянең бер номинациясе журналистикага багышлана.
Яшь аермасы төрле булуын искә алып өч төркемгә бүленеп чыгыш ясады конференциядә катнашучы укучылар. «Безнең сүз» дип аталган балалар матбугаты номинациясендә “Кызлар иле” газетасына иң зур бәя бирелде.
Халыкара театр көненә туры китереп үткәрелү дә юкка түгел. Драматургия (сәхнәләштерү) өлкәсендә дә мәктәп укучылары сынатмый.
Казан мәктәпләре арасында “Беренче театр” спектаклен сәхнәләштереп Кызлар гиминазиясе укучылары жюри комиссиясен гаҗәпкә калдырды.
Район мәктәпләре арасында Туфан абый якташлары беренче булды.
Конференциянең йомгаклау өлешендә Һәр яшь төркеме буенча иң яхшы фәнни һәм иҗади эш авторларына диплом һәм истәлекле бүләкләр тапшырылды.
Мөришдә Җиһан, Таһир Хәсәнов. Татарстан яңалыклары.
