Быел чыгарылыш сыйныф укучылары информатика һәм мәгълүмати- коммуникацион технологияләр буенча Бердәм Дәүләт имтиханнарын компьютерда тапшырачак.
Бу хакта хөкүмәт йортында узган брифингта Татарстан Мәгариф һәм фән министры Илсур Һадиуллин сөйләде. Аның сүзләренә караганда, быел имтиханнар биремнәре узган еллардагы материалларга охшаган. Практик программалаштыру, электрон таблицалар белән эшләү һәм мәгълүмат эзләү кертелгән. Биремнәрне программалаштыру телләрендә үтәргә мөмкин, бары тик Бейсиктагы мисаллар гына төшереп калдырылган. Компьютер формасында информатика һәм мәгълүмати- коммуникацион технологияләр буенча имтихан 24 һәм 25 июньгә билгеләнгән. Аны ике мең биш йөздән артык укучы тапшырырга планлаштыра. Быел Бердәм Дәүләт имтиханнарын барлыгы 18 меңнән артык кеше тапшырырга тиеш.
