Республикабызның мәдәни тормышында әһәмиятле вакыйга – Татарстан Язучылар берлегенең чираттагы XIX съезды булды. Корылтай 4 елга бер үткәрелә. Ул 2020 елның маенда ук узарга тиеш иде. Илдәге вәзгыят сәбәпле аны Язучылар берлеге идарәсе бер елга чигерде. Язучыларның һәр корылтае җәмәгатьчелектә зур кызыксыну уята.
Татарстан Язучыларының 19нчы съездына каләм ияләре, рәсми кунаклар Тинчурин театры залына җыелды.
Театр залында барган төп мәйданчыкка видеоэлемтә аша берлекнең Чаллы һәм Әлмәт бүлекчәләре кушылды. Татарстан язучыларына республикабыз Президенты сәламләвен Президент Аппараты җитәкчесе Әсгать Сәфәров җиткерде.
Махсус кунак буларак сьездда туган телләрне саклау һәм үстерү мәсьәләләре комиссясе рәисе,Татарстан Дәүләт Советы Рәисе урынбасары Марат Әхмәтов катнашты. Язучыларга дәүләт бүләкләре һәм Рәхмәт хатлары тапшырылды.
Бүләкләнүчеләр арасында 2020 елда вафат булган эзтабар язучы Шаһинур Мостафин да бар иде. Дәүләт бүләген улы кабул итеп алды. Шулай ук арабыздан киткән язучылар аягүрә басып искә алынды.
Язучылар мәдәниятыбызның ныклы терәге булырга тиеш, берлеккә көчле лидер кирәклеген мәдәният министры Ирада Әюпова искәртте.
Яңа рәис вазыйфасына дүрт кандидат тәкъдим ителде. Алар Рамис Аймәт, Вахит Имамов, Рафис Корбан һәм Ркаил Зәйдулла. Әмма яңасын сайлаганчы элеккеге рәисе үзе идарә иткән чорда берлек башкарган эшләргә хисап тотты. Сәхнәгә шулай ук кандидатларны яклап чыгыш ясаучылар да күтәрелде.
Идарә әгъзлары рәисне яшерен юл белән сайлауны кабул итте. Тавыш бирү нәтиҗәләре буенча Татарстан Язучылар берлеге рәисе итеп Ркаил Зәйдулла сайланды.
Заман технологияларына, таләпләренә туры китереп татар әдәбиятын дөньяга тарата, таныта белү кирәк. Иң мөһиме Татарстан язучылар берлеге корылтаенда кабул иткән карарлар милләтебез үсешенә өлеш кертсен иде. Ә монысын киләчәк күрсәтер.
Ләлә Зәйнуллина, Дамир Мөхәммәтханов. Татарстан яңалыклары.