Буа районының Яңа Чәчкап авылында “Ата-баба нигезе” дип исемләнгән китапны тәкъдим итү кичәсе булды. Ул 20 ел элек нәшер ителгән басманың дәвамы. Китап авторлары әйтүенчә, әлеге басмада киләчәк буынга тапшырырлык күп мәгълүмат тупланган.
Авыл җирлеге тарихына багышланган икенче китапны тәкъдир итү – чыннан да бәйрәм. Рәис Нәгыймуллин бу эшнең башлангычында торучыларның берсе. Китапта авылдагы һәр нигез, анда яшәүчеләр турында мәгълүмат бар.
Икенче басма өчен мәгълүмат күп еллар дәвамында туплана. 2 дистә ел элек дөнья күргән “Туган туфрак җылысы”ның дәвамы булды ул.
Кичәгә беренче басылып чыккан китапның авторы Нурулла Бикмуллинның улы һәм кызы да кайткан иде. Әтиләренең эшен дәвам итүче авылдашларына алар рәхмәт сүзләре җиткерде.
“Ата-баба нигезе “ дип исемләнгән китап әлегә 200 данә – авылда һәр йортка берәр китап исәбендә бастырылган. Киләчәктә аны, тулыландырып, күпләп тә нәшер итәргә исәпли чәчкаплылар.
Тәкъдир итү кичәсе матур җырлар, кунаклар чыгышы белән үрелеп барды. Киләчәк буынга мирас булып каласы китап белән бик горурлана авылдашлар.
Алсу Сәмигуллина, Гакыйл Камалетдинов. Татарстан яңалыклары
