Республиканың студентлар массакүләм мәгълүмат чаралары Ассоциациясе төзелде. 40ка якын яшьләр оешмасы берләште. Түгәрәк өстәл янында сөйләшүдә журналистика өлкәсендәге төп мәсьәләләрне Яшьләр эшләре министрлыгы һәм республика Хөкүмәте ярдәмендә хәл итү мөмкинлекләре турында фикер алыштылар.
Булачак табиблар да журналистика белән кызыксына. Студентлар тормышы турында басма матбугатта гына түгел, цифрлы мөмкинлекләрдә дә сөйлиләр.
Яшьләр белән нәтиҗәле һәм заманча методлар белән ничек эшләргә кирәклеге турында студентлар үзләре сөйләде. Кырыкка якын яшьләр массакүләм мәгълүмат чаралары вкәилләре түгәрәк өстәл янында очрашты. Яшьләр журналистикасының бүгенге проблемалары буенча фикер алыштылар. Проблемаларны җайга салу юлларын үз берләшмәләре сьездында тикшерәчәкләр.
Ассоциация яшьләр массакүләм мәгълүмат чараларының бердәм нигезе булачак. Хәзер без үзебез генә түгел. фикердәшләребез булуын да тоябыз.
Яшьләргә республика Хөкүмәте, Татарстан югары уку йортлары ректорлары советы һәм студентлар лигасы ярдәм итәчәк.
Медиа-киңлектә яшьләр үзләрен ышанычлы хис итсен өчен, профессионаллар да ярдәм итәчәк. Илшат Әминов Ассоциациягә республика Журналистлар берлегенә кушылырга тәкъдим итте.
Киләсе утырыш 19 мартка билгеләнде. Татарстан Президенты Рөстәм Миңнеханов белән бергә яшьләр проблемаларын уртага салып сөйләшергә җыеналар.
Регина Сафиуллина, Владимир Юрков, Татарстан яңалыклары.
