Башкалабызның Горький шоссесы участогын киңәйтүгә бәйле рәвештә, 300 гә якын җир кишәрлеге азат ителергә тиеш. Бу магистраль шәһәргә кергәндә төп юлны бушатырга тиеш, чөнки хәзер анда көн саен транспорт бөкеләре барлыкка килә. Яңа трасса кайдан уза? Бу хакта киләсе сюжетта.
Һәр иртә башкалабыз кунаклары һәм халкы — керү юлында бөкеләргә очрый. Горький шоссесы иртәнге сәгатьләрдә Бермуд өчпочмагына охшап кала. Иртән сәгать 7 тулганчы шәһәргә керә алмасаң, шактый көтәргә мәҗбүр буласың.
Берничә чакрымга сузылган бөкеләрне хәтта кошлар очкан биеклектән дә күрүе кыен. Иртән бигрәк тә мәшәкатьле. Сул як хәрәкәт полосасында транспортның тизлеге сәгатенә ун чакрымнан артмый.Бу урында транспорт йөрешен җайга салу өчен, өстәмә юл участогын төзүгә керештеләр. Трасса элеккесеннән көньяктарак уза.
Горький шоссесының икенче чираты төзелешенең башланган чаты билгеле. Уңда Киров дамбасы, сулда елга техникумы . Бу урында юл рельслар юлы буйлап уза, ә алга таба күпер кичүенә кадәр дәвам итәргә тиеш.
Юл озынлыгы- 13 километрга якын. Транспорт артериясе төзелеп килүче Серебряный бор, 32 нче Хәрби шәһәрчек аша узып, шәһәрнең Киров районын М7 трассасы белән тоташтырачак.
Төзелешнең беренче этабы өлешчә тәмамланган — бу километр ярым полосалы юл. Хәзер эшчеләр керү зонасын төзүгә, территорияләрне чистартуга керешә. Шуңа бәйле рәвештә өч йөзгә якын җир кишәрлеге азат ителергә тиеш. Башкарма комитет вәкилләре сүзләренә караганда, барлык җир хуҗаларына компенсация түләнә. Ә 2025 елда трасса ачылыр дип көтелә.
Айнур Вәлиәхмәтов, Сергей Павлухин, Татарстан яңалыклары.
