Әдәби аһәңгә сусаган халыкны кузгалтып җибәргән Татар сүзе бәйгесе тәмам. Ел ачышы булган күркәм чараның гала-концерты Халыклар туган телләр көненә туры китереп, Габдулла Тукай исемендәге дәүләт филармониясендә узды. Күпме кеше катнашкан? Жиңүчеләр кемнәр? Татарстан Республикасы Президенты каршындагы татар телен саклау һәм үстерү мәсьәләләре комиссиясе рәисе Марат Әхмәтов тагын нинди бәйге игълан иткән?Бу сорауларга җавап — хәбәрчебез Мөршидә Җиһаннын махсус репортажында.
Дәртле көй булып та, моң булып та агылган , газиз татар телебезгә битараф калмаучылар Габдулла Тукай исемендәге филармония залына җыелды.
Татар сүзе үрнәген сәхнәдә үзе исбатлап күрсәткән Фоат Галимуллинны тыңлаган тамашачы арасында Фәйзи Йосыпов, Айрат Арсланов кебек нәфис сүз осталарын хәтерләүчеләр шактый иде. Әлеге бәйгенең максатларының берсе итеп , нәкъ менә татар нәфис сүзенә кызыксыну уяту, шигъри аһәңне тоярга өйрәтү дип язылган нигезләмәдә.
Генофондыбызның көченә тагын бер кат инаныр өчен кирәк иде бу бәйге дип белдерде “Tatar сүзе”нең жюри рәисе, Айдар Фәйзрахманов.
Бәйгегә барлыгы 3955 кеше катнашкан. Бәя бирүчеләр дә оештыручылар да сәхнәдә чыгыш ясаган вакытта бу санны төрләндереп кат-кат кабатлады. Шуларның барысына да рәхмәт хатлары җибәрелгән. Ә халыкара телләр көнендә үткәрелгән татар сүзе бәйгесендә 31 конкурсантка тантаналы рәвештә премия һәм бүләкләр тапшырылды.
Катнашучылар шигърият, проза, мәсәл номинацияләрендә яшь аермалыкларын исәпкә алып дүрт төркемдә бүләкләнде.
Проза номинациясендә бүләкләнгән Гөлчәчәк Камалиеваны катнышырга яшь чикләүләре булмау җәлеп иткән
Мәсәл сөйләп жюрины шаккатыручыларның бепрсе Азнакайдан Илдар Динмөхәммәтов сәнгать мәктәбендә балаларга актер осталыгы дәресләрен укыта. Укучылары өчен шәп үрнәк.
Татар сүзе нинди булырга тиешлеген тамашачы булып килгән әдәбият –сәнгать һәм сәясәт эшлеклеләре дә уртаклашты .
Татар сүзен җитренә җиткереп әйтүчеләр арасында Балтач, Актаныш, Азнакай районнары өстенлек итә. Иң күп катнашкан балалар да әлеге районнардан.
Галия Йосыпова укучылары Мәръям Зәкиева мәсәл, ә Нәргизә Сабирҗанова проза номинациясендә беренче урынга лаек булды.
“Профессионаллар” категориясендәге катнашучылар арасында хезмәттәшебез Татарстан дәүләт телерадиокомпаниясченең алып баручысы Идел Кыямов та икенче премиягә лаек булды. Җиңүчеләр арасында 13 яшьлек Тимур Фазлыев та бар иде. Мөмкинлекләре чикле булуга кармастан ул сәнгатьле сөйләмгә хәвәс бала.
һәр көнне туган тел көне, дип яшик, шул чакта киләчәгебез өметле булыр дип ассызыклады чыгышында Марат Әхмәтов.
Халыкара туган тел көнендә тагын бер автор башкаручылар бәйгесе игълан ителде. Филармония җитәкчелеге тарафыннан тәкъдимителгән яңа бәйгненед әлегә нигезләмәсе әзерләнә.
Берочтан шунысын да әйтеп үтик, Кадим Назыйр улы Нуруллин «Татарстанның атказанган сәнгать эшлеклесе» дигән мактаулы исемгә лаек булды.
Мөршидә Җиһан, Илдар Галәветдинов.
