Иң кулае – пластик савытлар, ә җим өчен яхшысы – көнбагыш һәм тары ярмасы. Мамадышның яшь урманчылары, канатлы дуслары хакында кайгырта. Районның Олыяз авылы лицеенда укучылар, 100гә якын җимлек ясаган.
Фарил Рәхимҗанов җимлекләр ясаганда нәрсәләргә аеруча игътибар бирергә кирәклеген аңлата. Кошлар аның эченә иркен кереп һәм чыгып йөрергә тиеш, ризыкны мулдан салып булсын, агачка беркетү җайланмасын да нык итеп эшләү зарур. Әле бу таләпләрдән тыш, укучылар җимлекләрнең матурлыгына да игътибар итә. Савытларның тышы кош рәсемнәре белән бизәлә.
Адилә Нуруллина, Олыяз лицее укучысы
Олыяз лицееның биология фәне укытучысы, “Яшь урманчылар” түгәрәге җитәкчесе Фарил Рәхимҗанов сүзләренчә, кышын кошларга салкыннар түгел, ә ачлык куркыныч тудыра. Шуны истә тотып, һәр елны балалар белән җимлекләр әзерлиләр. Быел гына да аларның саны 100гә якын булган. Ризык салынучы савытларның күпчелеге пластик материалдан эшләнә. Төрле зурлыктагы шешәләр, канистралар яшь урманчылар кулы аша узып, канатлы дусларыбызның аш бүлмәсенә әверелгән. Араларында фанера яки тактадан ясалганнары да бар.
Фарил Рәхимҗанов, “Яшь урманчылар” түгәрәге җитәкчесе
Әлеге түгәрәкнең төп составын 6 нчы, 8 нче һәм 10 нчы сыйныф укучылары тәшкил итә. Дәресләр лицей каршында эшләүче Мәктәп урманчылыгы кысаларында оештырыла.
Рәсүл Якупов, Олыяз лицее директоры
Укучылар әйтүенчә, кошлар бигрәк тә көнбагыш һәм тары ярмасын үз итә. Шулай ук карабодай, ипи валчыкларын да канатлы дуслар бик яратып ашый. Җимлекләрнең бер өлешен белем йорты янәшәсендәге агачларга элсәләр, күпчелеге урман буйларында урын ала.
