Арт-терапия, ионлаштырылган һава, ком белән дәвалау. Казандагы 7нче Шәһәр хастаханәсе янында урнашкан күлләр янында яңа парк барлыкка килә. Ул авыруларны тернәкләндерү урыны булырга тиеш. Биредә якын-тирәдәге йортларда яшәүчеләр дә ял итә алачак. Күлләрне реконструкцияләү буенча масштаблы проект нинди? Без дә кызыксындык.
Мондый масштаблы проект Россиядә беренче тапкыр гамәлгә ашырыла. Тиздән бу урында җиденче шәһәр хастаханәсе пациентларын тернәкләндерү буенча уникаль комплекс була.
Архитектор Виталий Волков: » Йөрәк авыруларын тернәкләндерү мәйданы бар. Анда җиһазлар куела, коляскадгы авырулар да тернәкләнә ала.Табиб барлык авырулар белән үткәрелә торган күнегүләрне контрольдә тота.»
Реконструкция ике этапта уза. Башта кече күлләр, ә соңрак зур күл үзгәртелә.
Һәр пациент индивидуаль тернәкләнә. Паркта спорт мәйданчыгы, тренажерлар, дәвалау җайланмалары урнаштырыла.
ТР сәламәтлек саклау министры урынбасары Владимир Жаворонков: » Бу дәвалауның комплекслы проекты. Бар нәрсә авыруны һәрьяклы тернәкләндерүгә юнәлдерелгән. Әлегә мондый концепциянең гамәлдә булганы юк.»
Реконструкциянең икенче этабы — зур күл территориясен тәртипкә китерү. Җәяүлеләр өчен сукмаклар, уңайлы утыргычлар, җәяүлеләр зонасы булдырыла. Биредә хастаханә пациентлары да, якын-тирә йортларда яшәүчеләр дә йөри ала.
Казан мэры Илсур Метшин: «90 нчы елларда бу урыннарда төзелеш эшләре алып барылды, Ишегалларыннан башка ял итү урыннары юк иде. Башта бу күлләр янында парк, җәяү йөрү зоналарын булдырабыз.Ә икенче этапта Гаврилов урамындагы яр буен төзекләндерүне максат итеп куйдык.»
Күлләр янында авыруларны тернәкләндерү, шулай ук табибларның ял итү урыны да булыр дип көтелә. Паркны реконструкцияләүгә быел керешәләр.
Ралина Абрамова, Владимир Юрков, Татарстан яңалыклары.
