Волонтерлар штабы ярдәм итәргә теләүчеләрне җыя. Өй шартларында короновирустан дәваланучыларга ярдәм кирәк. Волонтерлар даруларны авырулар белән элемтәгә кермичә генә адреслар буенча тараталар. Хәзер Казанда волонтерларның 11 штабы, аларда 300 волонтер эшли. Ә даруларга заявка бирүчеләр саны артып тора.
Волонтерның эш көне биредә штабтан башлана. Бу төргәкләрдәге даруларны волонтерлар өйдә короновирустан дәваланучыларга китерәләр. Барысы да оператив эшли – колл-үзәктә пациентлардан гаризалар кабул итәләр.
Казан шәһәренең балалар һәм яшьләр эшләре комитеты белгече Альбина Гуревич: «Башта поликлиникага гариза алына. Табиб килеп, рецепт язгач, даруханәдән безгә шалтыраталар. Штаб җитәкчесе даруханәдән дарулар ала, без аларны адрес буенча таратабыз. Безнең машина бар, волонтерларны озатып йөрибез.»
Тиз эшләргә кирәк. Гариза кабул иткәч, даруларны илтеп бирү вакыты 36 сәгатьтән дә артмаска тиеш. Юлга чыгу алдыннан инструктаж үтәләр, температура үлчәнә, саклык чаралары өләшенә. Бер сменада гадәттә волонтер 5-6 фатирны йөреп чыга. Чыгу графигын һәр волонтер үзе сайлый. Штаб волонтерлары буш вакытларында эшли. Юлия-магистратура студенты, укудан соң үзе теләп ярдәмгә ашыга.
Юлия Мирясева: «Кешеләргә ярдәм итә алуыма шат. Мохтаҗлар бар, даруларны тиз арада китереп бирергә тырышам.»
Штабның координаторы даруларны илтеп бирү адресларын волонтерның яшәү микрорайонында сайлап ала.
Даруларны авырулар белән элемтәгә кермичә тапшыралар -волонтер төргәкне ишек янында калдыра, шалтырата һәм дистанция саклый. Авыру даруны алганда, фотосүрәткә төшерә. Пациентның даруларны кабул иткәнен раслау өчен. Барысы да электрон архивка китә. Хәзер Казанда 11 штаб, 300 волонтер, ә ярдәм көн саен кирәк. Штабта яңа волонтерларгның килүен көтәләр.
Һәр гражданин волонтер була ала. Төп таләп-18 яшькә җитү. Волонтер булу өчен балалар һәм яшьләр эшләре Комитетының теләсә кайсы социаль челтәренә язарга яки телефоннан шалтыратырга кирәк.
Барлык волонтерлар үз теләкләре буенча COVID тантүләүсез вакцина ясата ала.
Полина Лисина, Ренат Сәхибгәрәев, Татарстан яңалыклары.
