Кайбер автомобиль йөртүчеләр юлны кыскартырга теләп, кагыйдәләрне бозалар. Тиешсез урыннарда сул як хәрәкәт полосасына борылып чыгу очраклары еш күзәтелә. Мондый тәвәккәллек авария китереп чыгару куркынычын арттыра. Кагыйдәләрне бозучыларны кисәтү өчен, Казан юлларына махсус камералар урнаштырдылар.
Узган елда Казандагы юл чатларында 373 юл — транспорт һәлакәте булган — бу шәһәрдәге һәр дүртенче авария. Аларда бер кешенең гомере өзелгән, 450 дән артык кеше тән җәрәхәтләре алган. Яңа камералар куелгач, юл фаҗигалары саны кимегән.
Камералар Җиңү һәм Ямашев проспектлары чатларында, Сул Болак- Галиәскәр Камал урамы, Уң Болак – Астрономия урамы, Гадел Кутуй — Гвардиячеләр урамнары киселешләрендә — барлыгы 19 чатта куелган.
Бу үтемле чара. Юлны кыскартырга теләгән машина йөртүчеләргә бер мең ярым сумга кадәр штраф каралган.
