Тел — буыннан-буынга тапшырылырга тиешле милли байлык. Тел югалса, милләт тә бетә. Милли хәзинәбезне саклау эшен камилләштерү уңаеннан Татарстанда махсус комиссия эшли.
Тәтештә комиссиянең узып баручы елдагы соңгы күчмә утырышы булды. Татарстан Республикасы Президенты каршындагы татар телен саклау һәм үстерү мәсьәләләре комиссиясе җитәкчесе, Дәүләт Советы рәисе урынбасары Марат Әхмәтов рәислегендәге вәкилләрдән торган делегация мәдәният һәм мәгариф объектларын карады. Күчмә утырышта хәбәрчебез Ләлә Зәйнуллина да катнашты.
Татар телен үстерү һәм саклау мәсьәләләре беренчеләрдән булып шәһәрдәге 1нче гомуми белем бирү мәктәбендә каралды. Күп телле мәктәптә 730 бала белем ала. Алар рус, татар, чуаш, мордва балалары. Рус мәктәбендә укучылар татар телен дә өйрәнә. Уку йорты фойесында Татарстан Президенты Рөстәм Миңнеханов тарафыннан игълан ителгән 2021нче ел — Татарстанда туган телләр һәм Халыклар бердәмлеге елына багышланган экспозиция бизәлгән. Мәктәп педагоглары һәм укучылары мастер-класслар күрсәтте.
Тик җырлап — биеп кенә эш бармас, белемне ныгытырга кирәк. Иң мөһиме ел дәвамында ай саен ана телебезгә өйрәтә торган милли чаралар, проектлар таләп ителә.
Марат Әхмәтов Дәүләт Советы рәисе урынбасары
Күп милләтле Тәтеш районында 26 гомуми белем бирү учреждениесе, 17 балалар бакчасы бар. Бу төбәктә катнаш никахлар күп. Укытучы-тәрбиячеләрне әти-әниләрнең ана телләренә битараф булуы борчый. «Миләшкәй» татар балалар бакчасында да шуңа охшаш хәл. Бакчага йөрүче 125 баланың 15е генә татар төркемен сайлаган. Кунакларга әнә шул төркемдәге балалар чыгышы күрсәтелде.
Гөлнар Галиәкбәрова тәрбияче
Кунаклар татар мәктәбендә дә булды. Әлеге белем йорты күп еллар район татарларын берләштереп торучы милли үзәк. Мәктәп укучыларын ана телләренә тарту, кызыксындыру максатыннан интерактив дәресләр, “Сәяр”, “Хәят” — театр, музыка түгәрәкләре эшли.
Миләүшә Хәмитова Тәтеш татар урта гомуми белем бирү мәктәбе директоры
Туган телләрне саклау мәсьәләләре комиссисе караган ике мәктәптә дә укыту туган телдә оештырылган. Районда Чуаш компонентлы 7, мордва компоненты булган 1 мәктәп бар. Әмма ана телләрендә белем алырга теләк белдерүчеләр азрак шул. Уңай якка үзгәрешне киләсе 2021нче Туган телләр һәм Халыклар бердәмлеге елы үзгәртер дигән өмет, ышаныч зур.
Марат Әхмәтов Дәүләт Советы рәисе урынбасары
Рәмис Сафиуллин Тәтеш муниципаль районы башлыгы
Тәтеш районына сәфәр вакытында телләр укыту мәсьәләсен уртага салып сөйләштеләр, фикер алыштылар. Очрашуга Республиканың сигез муниципаль районыннан килгәннәр иде.
Һәммәсен күпмилләтле республикабызда ана телебезне саклап калу мәсьәләсе борчый. Иң мөһиме ана телебезгә мәхаббәт гаиләдән башлана. Шуңа да, Марат Әхмәтов күбрәк бакчага йөрүче балаларның әти-әниләре белән үтемлерәк эш алып барырга чакырды. Киләсе елда хезмәтенә күрә хөрмәте: яңа грантлар, кызыксындыру чаралары да шактый булачак.
Ләлә Зәйнуллина, Ирек Хәмидуллин, Татарстан яңалыклары. Тәтеш районы.
