Тиздән яңа ел җитә. Шул уңайдан Буа районының Әхмәт авылы мәдәният йортында Яңа ел прәннекләре ясау һәм чыршы бизәү буенча мастер-класслар оештырыла башлады. Аларның берсендә безнең иҗат төркеме дә катнашты. Яңа ел прәннекләре ясау өчен өстәлдә барысы да әзер, фантазияңне эшкә җигеп, төрле фигуралар кисәсе бар. Балалар үзләре дә эшне ничек башларга икәнлеген белә, чөнки мондый мастер-класс мәдәният йортында беренче генә үткәрелми. Көзге каникуллар вакытында укучылар биредә еш “кунак булганнар”.
Әдилә Әхмәтшина: “Безне Гөлназ апа баштан ук, беренче көнне үк яшьте. Без анда төрле көнне төрле әйбер эшләдек. Беренче көнне пицца пешердек, капкейклар, икенче көнне ул безгә күңелле стартлар оештырды. Без бергәләп уеннар уйнадык. (00:30) Безгә бу бер атналык каникул бик ошады. Рәхмәт бик зур Гөлназ апага, тагын шундый күңелле, кызык каникуллар булыр дип көтәбез”
Гөлүсә Сираҗева, авылда яшәүче: “Балаларыбызны, оныкларыбызны көзге каникулда күрә дә алмадык. Компьютерлар да читкә күчте, телефоннар да читкә күчте безнең. Бернәрсә кирәкмәде. “Әни, кайчан Гөлназ апа килә? Кайчан безгә нәрсә үткәрә?” Аннан кайткач инде бик күп мәгълүмат кайта иде безгә. Бик каты яратып сөйлиләр иде, нәрсә эшләгәннәр. Һәр көнне бер бәйге үткәрә иде. Анарга рәхмәт яусын”
Әзер прәннек фигуралары мичтә кызарган арада балалар Яңа ел чыршысын бизәп куйдылар. Мәдәният йорты мөдире Гөлназ Әмирханова сүзләренчә, егет-кызлар һәр чарага бик теләп йөриләр. Ә алар монда еш үткәрелә.
Гөлназ Әмирханова, мәдәният йорты мөдире: “Безнең балалар даими сорап, кайчан клубка барабыз, нәрсә үткәрәбез дип, шушылай сорап торганнан соң, без алар белән Яңа елга багышлы менә шундый прәннекләр эшләргә булдык. Балалар да, аларның әти-әниләре дә безгә даими булышып торалар, рәхмәт аларга. Бер әйткән эштән дә баш тартмыйлар, әйткән эшләребезне үтәп баралар, балаларын да шулай мастер-классларга җыеп, мәктәптән сорап, клубка озаталар инде алар. Бик зур рәхмәт әйтәсе килә аларга да”
Авыл мәдәният йорты балалар белән генә түгел, өлкәннәр белән дә төрле юнәлешләрдә актив эш алып бара, шул исәптән социаль челтәрләрдә дә.
Динә Абдрахманова, Яңа Чәчкап авыл җирлеге башлыгы: “Туган якларын искә алып сагынучылар шушы Инстаграм, социаль челтәрләр аркылы авылның эшчәнлеге, мәдәният йортының эшчәнлеге турында һәрвакытта да алар танышып баралар. Һәм инде без күрәбез, аның эшчәнлеге белән алар һәрвакытта да канәгать. Шундый матур ягымлы комментарийлар язалар. Һәрвакытта да авылга җан керде, диеп. Авыл халкы аңа рәхмәтен үзен күргәндә дә җиткезеп тора, шушы социаль челтәрләр аркылы да җиткезеп тора.”
Кар бөртеге, чыршы формасында булган Яңа ел прәннекләрен балалар төрлечә бизәделәр, эш барышында бәйрәм алды атмосферасына чумдылар.
Алсу Сәмигуллина, Сирин Хәсәнов. Татарстан яңалыклары.
