Татарстанда медицина хезмәткәрләренә коронавируска каршы вакцина ясау дәвам итә. Республикага өч меңгә якын “Спутник V» прививкасы кайтарылган. Алар башкала хастаханәләренә таратыла. 16 нчы хастаханә дә әлеге исемлеккә кергән.
16 нчы хастаханәдә медицина персоналының эш көне анкеталар тутырудан башлана. Антитәнчекләргә экспресс-тестлар ясала. Вакцина ясау алдыннан ул мәҗбүри процедура булып тора. Ә прививкалар Россиядә әзерләнгән.
Татарстанда өч меңгә якын вакцина дозасы бар инде. Медицина хезмәткәрләренең прививка ясау кампаниясе башланды. Алар хәзер коронавирус белән көрәштә иң үзәктә. Пациентларны дәвалау өчен табиблар үзләре сәламәт булырга тиеш.
16-нчы номерлы хастаханә баш табибы урынбасары Лилия Мөхәммәдуллина: «антитәнчекләр тиешле күләмдә формалашыр дип өметләнәм. Коллегаларымның, пациентларның ничек авыруын күргәч, прививка ясату фикере туды.»
Беренче прививкадан соң 21 көн узгач, аны кабат ясатырга кирәк. Россия экспертлары хәбәр иткәнчә, «Спутник» препаратының нәтиҗәлелеге 95 проценттан артып китә. Вакцина куркынычсыз, COVID-19га каршы тәнчекләр эшләүне стимуллаштыра.
коронавирустан массакүләм вакцинаца ясауга килгәндә, Татарстан Сәламәтлек саклау министрлыгында аны 2021 елның беренче кварталында башларга планлаштыралар. Нәкъ менә шул вакытта республикага прививкаларның яңа партиясе кайтарыла.
«Вектор» фәнни үзәге тарафыннан эшләнгән тагын бер вакцинаны тикшерүләр дә дәвам итә.Ул теркәлгән инде, бәлки, киләсе елда татарстанлыларга шушы төр препаратны кулланып прививка ясый башлаулары да мөмкин.
Вадим Струминский, Ирек Хәмидуллин, Татарстан яңалыклары.
