Чаллыда шикәр комы һәм үсемлек мае күпмегә кыйммәтләнгән? Бу сорауга прокуратура һәм Башкарма комитет хезмәткәрләре җавап эзләде. Алар шәһәрнең зур сәүдә челтәрләре кибетләрен тикшерде. Федераль гаммәви мәгълүмат чаралары 1 гыйнвардан ил хөкүмәте шикәр һәм май бәяләренең иң югары чикләрен билгеләргә мөмкин, дип хәбәр итте. Ә Чаллы кибетләрендә эшләр ничек тора?
Чаллыда яшәүчеләр азык-төлеккә бәяләр сизелерлек арткан, дип саный. Сатып алучылар бәяләр күпкә арткан товарларны ачыклаган.
Ревизорлар булып прокуратура хезмәткәрләре рейдка чыкты. Күзәтчелек ведомствосына икмәк, он, шикәр, көнбагыш маена бәяләрнең ни дәрәҗәдә артуын белергә туры килде.
Прокурор ярдәмчесе Светлана Гыйззәтова: «тикшерү барышында бүгенге көндәге һәм октябрь-ноябрь айларындагы бәяләр документларын сорадык.Чагыштырып карап, әлеге төр товарларга бәяләр арту факты бармы-юкмы икәнлеген белдек.»
Прокуратура хезмәткәрләре искәртеп узганча, закон 30 календарь көн эчендә бәяләрне 30 һәм аннан да күбрәк процентка арттыруга юл куймый. Рейдка Башкарма комитет хезмәткәрләре дә чыкты. Алар азык – төлеккә генә түгел, башка төр товарларга да игътибар иттеләр.
Башкарма комитетның икътисади үсеш һәм эшмәкәрлеккә ярдәм Идарәсенең баш белгече Александра Шәйхетдинова: «азык-төлек булмаган товарлардан — бәдрәф кәгазе, теш чистарту щеткалары, шешәләр, балаалр әйберләре бәяләренә игьтибар иттек.
Кибетләрдә кайбер товарларга ташламалар бар, ә бәясе көн саен үзгәреп торырга мөмкин, дип аңлаттылар.
Зур сәүдә челтәре кибете директоры Анастасия Шәйхетдинова: «2-3 сумга кыйммәтләнү була. Безнең сатып алучылардан, бигрәк тә пенсионер әбиләр өчен бу сизелерлек сан.»
Сәүдә үзәгенең операция директоры Марат Кривцов: «Бзгә ниндидер кискен бәя артулар турында шикаятьләр кермәде, бәяләрнең күтәрелүе теркәлсә, без белгән булыр идек.»
Бу чынбарлыкка ни дәрәҗәдә туры килә — соңрак билгеле булачак. Әлегә прокуратура хезмәткәрләренә өч ай эчендәге барлык документларны тикшерергә туры килә.
Рейд нәтиҗәләре буенча монополиягә каршы көрәш хезмәте тә тикшерү үткәрә.
Фәнис Мөхәммәтов. Эльвира Гайнетдинова, Татарстан яңалыклары, Чаллы.
