Татарстан укучылары юлда йөрү кагыйдәләре буенча белемнәрен тикшерә ала. Казанның 159 нчы лицеенда «Куркынычсыз юллар» дигән ачык дәрес узды. Шулай итеп, шул ук исемдәге Бөтенроссия онлайн — олимпиадасына старт бирелде.
Аделина Джумагулова юл билгеләрен беренче ай гына өйрәнми. Кыз яшь юл хәрәкәте инспекторлары сафына керергә ниятләгән. Юлда йөрү кагыйдәләре буенча белемнәрен ныгытасы килә.
Аделина Джумагулова: «миңа юл билгеләрен өйрәнү, үзеңне юлда ничек тотарга икәнлеген белү авыр бирелде. Юл билгеләре, кагыйдәләр күптөрле, истә калдыру җиңел түгел.»
Олимпиада бөтен ил буенча уза. Татарстанда анда 209 меңнән артык мәктәп укучысы катнаша. Алар арасында Милана Мальгина да бар.
Милана Мальгина: «кешегә юлны ничек аркылы чыгу, юлда үзеңне ничек тотарга кирәклеген белү мәҗбүри, чөнки юл — ул иң куркыныч урын. Сак булу сорала.»
Автоинспекторлар сүзләренә караганда, республика юлларында балалар үлеме саны соңгы елларда өчтән бер өлешкә кимегән. Быел Татарстанда 398 юл-транспорт һәлакәте булган, аларда 8 баланың гомере өзелгән.
ТР Эчке эшләр министрлыгының ЮХИДИ идарәсе башлыгы урынбасары Дамир Бикмөхәммәтов: «без олимпиаданың балалар арасында юл-транспорт һәлакәтләрендә имгәнүләрен кисәтүдә ярдәм итәчәгенә ышанабыз. Олимпиада балаларның үзләренең дә, ата-аналарның да юл хәрәкәте кагыйдәләрен яхшылап өйрәнүләрен һәм үтәүләрен күздә тота.
Олимпиада 11 декабрьгә кадәр дәвам итә. Анда һәр укучы катнаша ала. Укытуның белем бирү платформасында теркәлеп, шәхси кабинетка керергә генә кирәк. Катнашучылар онлайн режимда ун сорауга җавап бирә. Җиңүчеләр дипломнар һәм Рәхмәт хатлары белән бүләкләнәчәк.
Ләлә Зәйнуллина, Ралина Абрамова, Сергей Павлухин, Татарстан яңалыклары.
