Республикада Торак куркынычсызлыгы айлыгы барышында Дәүләт янгын күзәтчелеге хезмәткәрләре янгын куркынычсызлыгы буенча профилактик чаралар уздыра. Шул исәптән, ялгыз яшәүче өлкәннәргә, аз керемле гаиләләргә янгынны кисәтүче автоном саклану җайланмалары урнаштыралар. Быел гына да Буа районда 2000нән артык шундый җиһаз куелган. Янгын күзәтчелеге хезмәткәрләре аны һәр йортта булдырырга киңәш итә. Тулырак киләсе материалда. Сафия Муллина ялгызы гына яши. Өлкәннәргә куркынычсызлык чараларын күрү бик мөһим. Янгын күзәтчелеге хезмәткәрләре янгынны кисәтүче автоном җайланма урнаштыруына бик куанды ул.
Пенсионерга җайланмадан ничек файдаланырга икәнлеген җентекләп аңлаттылар, аны эшләтеп карадылар. Аз гына төтен исе чыкса да, әлеге җайланма тавыш биреп, шунда ук кисәтә.
Михаил Погодин да берүзе яши. Аңа көндәлек социаль хезмәткәр ярдәм итә. Шулай да, куркынычсызлык чараларын күрү беркайчан да артык булмый, ди.
Автоном җайланмалар берничә бүлмәдә түшәмгә беркетелеп куела, тәүлек дәвамында туктаусыз эшли.
Нияз Садыйков Буа янгын сүндерү гарнизоны җитәкчесе вазыйфаларын вакытлыча башкаручы
Янгынны кисәтүче автоном җайланмалар аз керемле гаиләләргә, ялгыз яшәүче өлкәннәргә, инвалидларга түләүсез нигездә урнаштырыла.
Шунысын да билгеләп үтәргә кирәк, янгын кисәтүче җайланмалар ярдәмендә күп кешенең гомере сакланып калына. Шуңа да янгын күзәтчелеге хезмәткәрләре аны һәр йортта булдырырга киңәш итә.
Алсу Сәмигуллина, Айрат Насруллов. Татарстан яңалыклары.
