Энҗе-мәрҗәннәрдән эшләнгән, чигелгән картиналар, бәйләгән башмаклар, курчаклар… Апас районы Әнәле авылында яшәүче Алия Шакирова — кул эшләре остасы. Кече яшьтән чигә, тегә, бәйли. Кәгазьдән, төрле җепләрдән дә матурлык тудыра, хезмәт җимешләрен туганнары-дусларына да өләшә.
Күңеле матур кешенең эш-гамәлләре дә изге була. Әнәле авылында яшәүче Шакироваларның өй эченә килеп кергәч, биредә чиста күңелле, матурлыкка гашыйк, тырыш хуҗабикә яшәвенә инанасың. Алия — кече яшьтән кул эшләре белән мавыга.
Алия чигә, бәйли, материаллардан чәчәкләр ясый, энҗе-мәрҗәннәрдән, сәйләннәрдән матурлык тудыра. Бар тырышлыгын, сабырлыгын, хыялларын эшкә җигә.
Алиянең хезмәт җимешләре күргәзмәләрдә урын алган. Күзләреннән шатлык бөркелүче, көләч йөзле, алтын куллы Алиянең уңганлыгына без дә сокланып кайттык.
Айзилә Батырханова, Гөлназ Вәлиева, Раил Галявов, Татарстан яңалыклары, Апас районы.
