Буа районының Вольнистан авылын икегә аерып торучы елга аша яңа җәяүле күпере салынды. Ул республикада эшләп килүче “Авыл территорияләрен төзекләндерү” программасы буенча төзелде. Халык өчен уңайлы булган күперне Буадагы хезмәттәшләребез дә күреп кайтты.
Күперне җирле халык “авылның йөрәге” дип йөртә. Чөнки нәкъ менә аның аша елганың бер ягында яшәүчеләргә аргы якта урнашкан мәктәп, кибет медпункт һәм башка социаль-мәдәни объектларга юл ачыла.
Рәкыйп Камалетдинов, авылда яшәүче: “Әбиләр-бабайлар хәзерге вакытта бит инде йөрергә кирәк, ничек тә күңел ачып кайтырга булса да, чыгарга кирәк. Менә шул иске күпердән йөри иде халык курка-курка. Хәзер, Аллага шөкер, курыкмыйча, теләсә нинди һава торышында барырлык юл булды”
Моңа чаклы авыл халкы иске күпер аша йөргән. Һәрьелны төзекләндерелеп торса да, аннан чыгуы шактый куркыныч булган.
Рәкыйп Камалетдинов, авылда яшәүче: “Бу басманы төзеделәр 2004нче елда, сайлау вакытында. Моны сайлау вакытында төзедек, бик тизлек белән. Мәктәп директоры Земдиханов оештырды, Рамил абый белән бергә. Бу басманы ике-өч көндә төзеп куйдылар. Ул ничектер вакытлыча гына килеп чыкмады, шулай торды-торды. Быел 2020нче елга кадәр хезмәт итте. Аны ремонтлап тордык без”
Яңа күпер республикада эшләп килүче “Авыл территорияләрен төзекләндерү” программасы буенча төзелгән.
Рамил Җамалетдинов, Янтуган авыл җирлеге башлыгы: “Шуннан соң без район җитәчесе Ранис Рафисович белән очраштык та, ул “Әгәр дә программага кереп, елга аша күпер салсак, авыл халкы ничегрәк карар икән?”, диде. Мин белә идем авыл халкы бу күпер турында хыялланганын. Чөнки ул һәрбер җыенда күтәрелә иде. (01:54) Бик зур рәхмәт әйтәсем килә район җитәкчелегенә, республика җитәкчелегенә бу программага безне керткәннәре өчен һәм авыл халкы өчен шундый уңайлык тудырганнары өчен”
Күпернең озынлыгы 138 метр. Киләчәктә аны дәвам итеп, тагын да озынайтырга исәплиләр.
Рамил Җамалетдинов, Янтуган авыл җирлеге башлыгы: “Без инде планлаштырып торабыз, киләсе елга да әлеге программа эшләсә, менә бу юлны без дәвам иттерергә телибез, мәктәп белән тоташтырырга һәм кибеткә кадәр җиткерергә дигән планнарыбыз бар әле киләсе елда”
Авыл халкы яңа салынган күпергә “тузан кундырмый”, ике якны бер итеп, рәхмәтләр әйтеп, аның аша курыкмый чыгып йөри.
Алсу Сәмигуллина, Гакыйл Камалетдинов. Татарстан яңалыклары.