Буадан яшь фермер Ренат Шәйхаттаров сементал токымлы үгезләр үстерә башлаган. Август ахырында мөгезле эре терлекнең беренче партиясен алып кайтканнар. Ел ахырына кадәр хуҗалык җитәкчесе аларның баш санын 800гә кадәр арттырырга планлаштыра. Бу максатка өстәмә биналар төзелеп килә. Хәбәрчебез ит токымлы үгезләр үстерү үзенчәлекләре турында белеште.
Менә алар – тыныч холыклы, тиз үсә торган үгезләр. Үтәли җилне яратмыйлар, бәйсез асрауда торалар. Ашарга да билгеле бер вакытта һәм бер рәткә тезелеп кенә киләләр. Ферма мөдире Наталья Никитина аларның рационында нәрсә булырга тиешлеген яхшы белә.
Наталья Никитина ферма мөдире: “Аларның рационына печән, сенаж, премикс, арпа һәм бодай керә. Аларны бергә кушып үгезләргә бирәбез”
Мондый тәрбия булганда үгезләр тәүлегенә килограмм ярымга кадәр артым бирә. Эре мөгезле терлекләрнең аппетиты, эмоциональ халәте һәрвакыт күзәтү астында. Моннан тыш, барлык ветеринария чаралары да вакытында үткәрелә.
Ренат Шәйхаттаров, хуҗалык җитәкчесе: “Бездә ветеринар -ферма мөдире. Шулай ук Башкорстостаннан килеп ярдәм күрсәтүче аудитор компания дә бар. Алар график буенча кирәкле процедураларны үткәрәләр, вакциналар ясыйлар. Казаннан да, җирле ветеринарлар да киләләр”
Әлегә өч бинаның берсе генә куллануда. Калганнары әзерлек стадиясендә. Аларның гомуми сыйдырышлыгы 1000 башка кадәр тәшкил итәчәк. Фермер бу потенциалны ел ахырына кадәр кулланырга планлаштыра.
Ренат Шәйхаттаров, хуҗалык җитәкчесе: “Бүгенге көнгә без тагын 700 баш мөгезле эре терлек алырга планлаштырабыз. Гомумән, 1000 башка кадәр җиткерәсебез килә. Аларның саны 800дән дә аз булмаячак”
Фермер үгезләрнең беренче партиясен Башкортстаннан алып кайткан. Яңаларын алу буенча эзләү алып бара. Мөгезле эре терлекнең ит токымлысына басым ясалачак.
Алсу Сәмигуллина, Сирин Хәсәнов. Татарстан яңалыклары.
