Яңа елдан Пенсия фондының республика бүлеге, күпфункцияле үзәкләрдә 14 төр хезмәт күрсәтә башлый. Бу хакта хөкүмәт йортында узган киңәшмәдә әйтелде. Быел күп функцияле үзәкләрдә 49 төр яңа хезмәтләр күрсәтү өстәлде. Кешеләр аларның кайсыларынан күбрәк файдалана? Хәбәрчебез ачыклады.
Хәзер гражданны күпфункцияле үзәкләр аша судсыз да банкрот дип танырга мөмкин. Төп шарт- бурыч суммасы 50 меңнән алып, 500 мең сумга кадәр булырга тиеш. Документларны рәсмиләштерү өчен паспорт, гариза, кредиторлар исемлеге, нотариусның ышаныч кәгазе дә җитә. Быел 417 гариза тапшырылган.
ТР дәүләт һәм муниципаль хезмәтләр күрсәтүнең күпфункцияле үзәге директоры Ленара Мозаффарова: » элек банкротлык процедурасы өчен түләргә туры килде. Яңа тәртип нигезендә бу процедура бушлай оештырыла. Түләү пошлинасы һәм башка түләүләр таләп ителми.»
Пандемия вакытында документларны күп функцияле үзәкләрдә рәсмиләштерделәр. Яңа хезмәтләр дә барлыкка килде. Автомобильне теркәү бик популяр. Моңа кадәр аны Җиңү проспектындагы үзәктә генә теркәп була иде. Киләсе елда яңа офис ачыла. Биредә штраф түләргә, шулай ук машина йөртү таныклыгын алыштырырга мөмкин булачак.
ТР дәүләт һәм муниципаль хезмәтләр күрсәтүнең күпфункцияле үзәге директоры Ленара Мозаффарова: « 27 меңгә якын кеше машина йөртү таныклыгын алыштыру өчен мөрәҗәгать итте. Әгәр дә кешеләр портал аша мөрәҗәгать итә икән, бу арзанга төшә. Тик әлегә портал эшләми, кешеләр безгә килә.»
Хәзер барлык хезмәтләр дә интернет аша күрсәтелә. Быел 44 төр хезмәт күрсәтүне цифрлаштырырга планлаштыралар.
ТР Цифрлы үсеш министрының беренче урынбасары Илья Начвин: «бүген Татарстан Республикасында 365 дәүләт хезмәте күрсәтелә. Җиде төр хезмәт кенә тулысынча цифрлаштырылган. Булачак эшнең күләмен чамалап була. Безнең бурыч-2023 елга барлык хезмәтләрнң дә цифрлы режимга күчерү.»
Күп функцияле үзәкләргә көн саен 15 мең кеше килә. Аларга 254 төр хезмәт күрсәтелә.
Ралина Абрамова, Илдар Галәветдинов, Тактарстан яңалыклары.
