Балаларның гына түгел, авыл яшьләренең дә күптәнге хыяллары тормышка аша. Мамадыш районының Югары Ушма авылында спорт мәйданчыгы төзиләр. Объект кулланышка тапшырылганнан соң, биредә сәламәтлекне ныгытырга, шулай ук төрле спорт ярышларын уздырырга мөмкин булачак. Төзелеш эшләре турында алдыгы репортажда.
Спорт мәйданчыгы җиңүләргә юл ача. Соңгы елларда илебездә спортка зур игътибар бирелә. Сәламәт яшәү рәвеше алып баручылар өчен район үзәкләрендә, шәһәрләрдә генә түгел, авылларда да зур мөмкинлекләр тудырыла.
Югары Ушма мәктәбе янәшәсендәге әлеге территория элек тә спортка битараф булмаучыларның даими рәвештә очрашу урыны иде, дип сөйлиләр. Укучы малайлар һәм авыл яшьләре җәй айларында биредә футбол уйнаганнар. Ә хәзер бу урында федераль һәм республика программалары кысаларында заманча универсаль спорт мәйданчыгы төзелеп килә. Ләкин ул футбол төре өчен түгел, ә волейбол һәм баскетбол уеннарына булачак. Әмма яшьләр моңа һич кенә дә кәефләрен төшерми. Киресенчә, объектны кулланылышка тапшыруларын түземсезлек белән көтәләр.
Кәрим Исмәгыйлев Югары Ушма мәктәбе укучысы
Камилә Низамова Югары Ушма мәктәбе укучысы
Спорт мәйданчыгын сафка бастыру өчен 2 миллион сум акча бирелә. Төзелеш эшләренә “ПМК Мелиорация” оешмасы җаваплы. 18гә 30 метр зурлыгындагы объектны төзү эшләре август ае уртасында башланган. Иң элек җир эшләре, аннан бетон өслеген әзерләгәннәр. Ул полимер материал белән капланган. Хәзерге вакытта территория челтәр койма белән әйләндереп алына. Аннан баскетбол уены өчен кәрҗиннәр урнаштыру һәм 4 ноктада багана утыртып, яктырткычлар кую кебек эшләр калып бара.
Югары Ушма авыл җирлеге үзидарәсе сәркатибе Илсөяр Котдүсова: «Авылыбызда мондый спорт мәйданчыгы төзү хыялда гына иде. Һәм менә ул чынга ашты. Балалар да, зурлар да бердәй сөенде моңа. Хәзер биредә балалар шау-шуы тынып тормас дип уйлыйбыз. Мәйданчыкны буш тотмаячакбыз. Төрле турнирлар, дусларча очрашулар үткәрергә исәп бар.»
Объектның яктыртылган булуы биредә тәүлекнең караңгы вакытында да шөгыльләнергә мөмкинлек бирәчәк.
