Актаныш авылы читендәге алачыклар юкка чыкканга да күпме гомер узды, соңрак инде тимер чүкегән тавышлар машина-техника паркында гына ишетелә иде. Ә хәзер район үзәгендә “Газстрой сервис” җәмгыятенең заманча тимер эшкәртү цехы барлыкка килде. Ә инде тәҗрибәне алар күрше Мөслим районындагы авыл хуҗалыгы техникаларына тагылма кораллар җитештерүче “Агро-мастер” җәмгыятеннән өйрәнгәннәр. Яңа тимер эшкәртү цехын хәбәрчебез дә күреп кайтты.
Эшмәкәр Равил Ярмиевне дә тимерчелекнең юкка чыгуы борчый. Өч ел элек ремонт техника станциясенең ташландык бинасын сатып алып, капиталь төзекләндерүне башлап җибәрә. Бинаны яхшылап тышлыйлар, тәрәзәләре алыштырыла. Эшчеләр өчен киенү, юыну, ял итү бүлмәләре ясала. Интернет челтәре, су, газ, электр, канализация үткәрелә. Районда яңалык буларак, бина Словениядән кайтарылган сигез инфракызыл газ казаны аша җылытыла. Ике мең 200 квадрат метр мәйданлы корылма тулы бер металл эшкәртү цехына әверелә.
Элек-электән һөнәрчелеккә мөкиббән бабайлары мондый мөмкинлекләрне күреп шаккатар иде. Андрей Кустовка районда йомышы төшмәгән кеше юктыр, берәүне дә кире бормас, бәяне дә чамалы гына куяр.
Цехка җиһазларны каян гына алып кайтмаганнар: Кытай, Оренбург, Санкт-Петербург, Екатеринбург, Рязаньнан, әле алып кайтасылары күпме. Барысын да инженер-белгечләр башта интернеттан өйрәнәләр, җиһаз эшләү заводларына барып күрәләр, ошаганнарын алып кайтып, кулланалар. Тимер ишекне нибары унбиш минут эчендә буяп-киптерәләр, яңача полимер металл буяу технологиясе санаулы вакыт эчендә эшне җиңеләйтә . Цифрлы программалы идарә станокларында унбиш эшче детальләр ясый. Токарь, эретеп ябыштыручылар һәрберсен сыйфатлы итеп әзерли.
Коллектив “Безнең ишегалды” программасына да кушылган. Ишегаллары өчен карагай агачы һәм тимердән җиһазлар ясыйлар. Эскәмияләр, җәйге ял өчен урындык-диваннар, балалар мәйданчыклары – барысы да экологик чиста материаллардан гына.
Кибетләр челтәре өчен күчмә сәүдә павильоннары ясауга керешкәннәр. Ут күршеләре Башкортстаннан да заказлар бирәләр.
“Газстройсервис” оешмасы төзелеш объектларында үз металл эшләнмәләр цехында җитештерелгән капка, койма, ишекләрне генә файдаланалар, шулай ук юридик һәм шәхси затларның заказларын да үтиләр.
Фәнис Мөхәммәтов, Ләйсән Газизова, Актаныш районы.
