Чаллының Кама төзелеш көллияте остаханәләргә җиһазлар сатып алу өчен федераль грант откан. Ә республикада барлыгы 6 көллияткә техник яңартуга 37 миллион сум акча бирелгән. Әлеге грант «Мәгариф» илкүләм проектының «Яшь профессионаллар» федераль проекты буенча гамәлгә ашырыла. Ул WorldSkills һөнәри компетенцияләр чемпионаты белән дә тыгыз бәйләнгән. Хәзер көллият остаханәләре югары дәрәҗәдәге ярышларны да уздыра ала.
Студентлар виртуаль чынбарлыкта җылылык белән тәэмин итү системасын идарә итә ала — агымның юнәлешен алыштыра, батареяларның нәрсәдән ясалганын күрә, виртуаль йортта температураны күзәтә. Боларның барысы да хәзер «Күп фатирлы йортны эксплуатацияләү һәм хезмәт күрсәтү» остаханәсендә бар.
Кама төзелеш көллиятенең 3 курс студентыт Дмитрий Михайлов: « Мөмкин булган барлык проблемаларны без программа аша модельләштерә, теләсә нинди обьектны җылыта алабыз.»
Биредә кайнар һәм салкын су белән тәэмин итү системасы да тәкъдим ителгән, ике катлы йорт мисалында – барысы да чын режимда эшли, ә су торбаларда циркуляцияләнә. Ә температураны үлчәү өчен яңа приборларны студентлар практик дәресләрдә кулланалар инде.
Кама төзелеш көллияте укытучысы Татьяна Ермошина: «Без хәзер студентларны җылыту, су белән тәэмин итү һәм канализация системасына өйрәтә, бөтен системаның ничек урнашуын күрсәтә алабыз.
Геодезия остаханәсендәге яңа үлчәү җиһазлары проект төзергә һәм мәгълүматларне флешка аша кертергә мөмкинлек бирә. Шундый җиһазлар шәһәрнең барлык төзелеш компанияләрендә дә юк. Геодезистлар 2022 елдан башлап, WorldSkills нормативлары буенча мәҗбүри имтихан тапшырачаклар.
Кама төзелеш көллияте укытучысы Марат Гатин: «Күргәнегезчә, монда Лазер юнәлешләре бар, без аны 500 метрга кадәр күрә алабыз.»
Буяу һәм декоратив эшләр остаханәсе дә үзгәргән. Элегрәк бу төр эшләр буенча студентлар практик дәресләргә төзелешкә абыр йөргән. Хәзер осталыкларын янәшәдә генә үстерү мөмкинлеге бар. Яңа җиһазлар куелган.
Шулай ук столяр һәм балта эше буенча остаханәләрдә җиһазлар тулысынча яңартылган. Хәзер остаханәләрнең һәрберсе WorldSkills ярышларын уздыру мәйданчыгы була ала. Өстәвенә, бу яңалыктан студентлар гына файдаланмый.
Кама төзелеш көллияте директоры Радик Биктимеров: «Узган ел без 305 студент әзерләдек, шулай ук 1592 өлкән яшьтәге кеше квалификация күтәрү курсларын узды, белемнәрен арттырдылар.»
Бүгенге көндә көллияттә өстәмә белем һәм һөнәри белем бирү буенча 35тән артык программа эшли.
Илнар Мостафин, Татарстан яңалыклары, Чаллы.
