Актаныш районы авыллары мәчетләренең 34 имамына шәһадәтнамәләр тапшырылды. Әлеге шатлыклы вакыйга мөселманнарның изге Мәүлид аена, Рабигыль-әүвәл аеның бишенче көненә туры килде.
Мәхәллә имамнары — авыл халкының рухи таянычы. Гаиләдә бала туса да, яшь парлар кавышса да, якыннары вафат булса да, олысы-кечесе имамга мөрәҗәгать итә.
Имамнар җыелышы Актаныш районы имам-мөхтәсибе Руслан хәзрәт Мортазинның Коръән укуы белән башланып китте.
Актаныш районында 54 мәхәллә эшли, шуларның 44е рәсми теркәлгән. Диния нәзарәте ярдәме белән калганнары да рәсмиләштерелә. Руслан хәзрәт нәзарәтнең быелгы катлаулы чорда ярдәме зур булуын билгеләп үтте.
Рамазан аенда волонтерлар ярдәмендә мохтаҗларга ифтар ашлары әзерләп таратылды. Җәен Аллаһ йортларында намазлар укылды, балалар өчен дини лагерьлар эшләде. Хәзер исә саклану чаралары янә көчәйтелде.
Көньяк төбәге казые, Аксубай районы мөхтәсибе Равил хәзрәт Зөфәров имамнарга уңышлар теләп, шәһадәтнамәләр, Татарстан мөфтие Камил хәзрәт Сәмигуллинның бүләге — Коръән китабын тапшырды.
Руслан хәзрәт Мортазин да җирлектә фидакарь хезәт куйган аксакалларга Рәхмәт хаты әзерләгән иде. Иң олы бүләкнең берсе Татарстан Диния нәзарәтенең “Бердәмлек” медаленә районның имам-мөхтәсибе Руслан хәзрәт Мортазин үзе лаек булды.
Милләтара һәм динара дуслыкны ныгытудагы хезмәте өчен шушы ук медаль белән Ләес хәзрәт Галләмов та бүләкләнде.
Ләйсән Газизова, Актаныш районы мәгълүмат үзәге.
